საქართველოს პრეზიდენტობის კანდიდატი, "ხალხის პარტიის" ლიდერი კობა დავითაშვილი საპარლამენტო უმრავლესობის ლიდერს, კოალიცია "ქართული ოცნების" პრეზიდენტობის კანდიდატის გიორგი მარგველაშვილის საარჩევნო შტაბის უფროსს დავით საგანელიძეს სადაზღვევო ბაზარზე არსებული მაფიის ლიდერს უწოდებს.
დავითაშვილის თქმით, კომპანია "არქიმედეში" დაზღვეულ მოქალაქეებს სამედიცინო დაწესებულებებში არ მკურნალობენ და ამის მიზეზად აღნიშნული კომპანიის გაკოტრება სახელდება, სახელმწიფო კი, მიუხედავად ამ ფაქტისა, "არქიმედეს" დაფინანსებას ისევ განაგრძობს.
"როდესაც თბილისში მოქალაქეები მიდიან პოლიკლინიკებში და კლინიკებში "არქიმედეს" პოლისით, მათ ეუბნებიან, რომ კომპანია კოტრდება და ამიტომ მომსახურებას ვერ გაუწევენ. კომპანიას ხარჯები გაუნახევრდა და შემოსავალი იგივე დარჩა. სახელმწიფო ბიუჯეტი ყოველთვიურად ამ კომპანიას ფულს ურიცხავს. სირცხვილია, როდესაც ახალი ხელისუფლების პირობებში ბოგინობს სამედიცინო მაფია, რომელიც ბიუჯეტის ხარჯზე ივსებს ჯიბეს და სირცხვილია, როდესაც უმრავლესობის ლიდერი და სახელისუფლებო პარტიის შტაბის უფროსი არის ამ მაფიის ლიდერი,"- განაცხადა კობა დავითაშვილმა.
