"სად არიან ის კუნთმაგარი ვაჟკაცები, რომლებიც 17 მაისს დარბოდნენ და ადამიანებს დასდევდნენ, ისინი ახლა აქ უნდა იდგნენ ჩვენთან ერთად და აპროტესტებდნენ საქართველოში მცოცავ ოკუპაციას. მე ვარ ჟურნალისტი და მე ვგმობ მცოცავ ოკუპაციას", - განაცხადა ჟურნალისტმა ინგა გრიგოლიამ.
ჟურნალისტებმა დვანში, საოკუპაციო საზღვართან ცოცხალი ჯაჭვი გაავლეს და საქართველოს ჰიმნი შეასრულეს .ქართველი ჟურნალისტების აქციას ე.წ. საზღვრის მეორე მხრიდან ოსური მედიის წარმომადგენლები აკვირდებოდნენ. აქციას დვანის ადგილობრივი მოსახლეობის ნაწილი შეუერთდა. საპროტესტო აქციის დასრულების შემდეგ, ჟურნალისტებმა მავთულხლართების გავლების შედეგად, ოკუპირებულ ტერიტორიაზე მოქცეული სახლები მოინახულეს, რომელთა მფლობელებს სახლების დაცლის უფლება საოკუპაციო რეჟიმა დღეს საღამომდე მისცა.
დვანის მცხოვრებლები მიიჩნევენ, რომ პროტესტსი გამოხატვით პრობლემა ვერ მოგვარდება და საკითხით ხელისუფლება უნდა დაინტერესდეს.
ქართველი ჟურნალისტების აქციას რუსეთის საგარეო საქმეთა სამინისტრო გამოეხმაურა. საგარეო საქმეთა მინისტრის მოადგილე გრიგორი კარასინსა და სამხრეთ კავკასიის საკითხებში ევროკავშირის წარმომადგენელ ფილიპ ლეფორს შორის სატელეფონო საუბარი შედგა.
"საქართველო უპასუხისმგებლოდ აგრძელებს სამხრეთ ოსეთის სასაზღვრო რაიონებში დაძაბულობის გაღვივებას", -აღნიშნა კარასინმა საუბრისას და ევროკავშირის სადამკვირვებლო მისიის დამკვირვებლებს მოუწოდა, "არ დაიშურონ ძალისხმევა ქართული ხელისუფლების ამ ახალი სახიფათო ჩანაფიქრის აღსაკვეთად". რუსულ მედიაში არ არის ინფორმაცია, იმის შესახებ თუ რას პასუხობს კარასინს ფილიპ ლეფორი.
"სამხრეთ კავკასიის საკითხებში ევროკავშირის წარმომადგენლის ყურადღება დაეთმო ინფორმაციას, რომ 28 სექტემბერს ქართველი ჟურნალისტების მასობრივი საპროტესტო აქციაა დაგეგმილი სამხრეთ ოსეთის საზღვართან მდებარე სოფელ დვანში. აღინიშნა, რომ ამ აქციით ქართული მხარე უპასუხისმგებლოდ აგრძელებს სამხრეთ ოსეთის სასაზღვრო რაიონებში დაძაბულობის გაღვივებას", - აცხადებენ რუსეთის საგარეო საქმეთა სამინისტროში.
დვანში დაგეგმილ ქართველ ჟურნალისტთა აქციას ე.წ. სამხრეთ ოსეთის პრეზიდენტის წარმომადგენელი პოსტკონფლიქტური საკითხების დარეგულირების საკითხებში, მურატ ჯიოევიც გამოეხმაურა. მისი განცხადებით, დვანში ჟურნალისტების აქცია საქართველოს ხელისუფლების დაგეგმილია და მას რეგიონში სერიოზული შედეგები მოჰყვება.
ჯიოევმა ჟენევის მოლაპარაკებების თანათავმჯდომარეებს წერილით მიმართა.
"მსგავსი აქციები სულ უფრო ხშირად იმართება ბოლო პერიოდში და მიმართულია როგორც ქართველი ხალხის, ისე საერთაშორისო საზოგადოების შეცდომაში შეყვანისკენ. სინამდვილეში, არც საქართველოს ტერიტორიული მთლიანობა ირღვევა და არც სუვერენიტეტი. სამხრეთ ოსეთის სასაზღვრო სამსახური რესპუბლიკის კანონმდებლობისა და სუვერენული უფლებების შესაბამისად ახორციელებს სახელმწიფო საზღვრის ზოლის მარკირებას. ამასთან, სამუშაოები ხორციელდება სამხრეთ ოსეთის ტერიტორიაზე და მიმართულია საზღვარზე სტაბილურობის შენარჩუნებისა და მისი უნებლიე დარღვევის აღკვეთისგან", - აღნიშნუილია ჯიოევის წერილში.
შეგახსენებთ, რომ 22 სექტემბერს ოკუპირებული ცხინვალის რეგიონის მოსაზღვრე სოფელ დვანთან რუსმა სამხედროებმა სადემარკაციო სამუშაოები განაახლეს. საოკუპაციო ზოლის 400 - 500 მეტრით გადმოწევის შედეგად, საქართვლოს ხელისუფლების მიერ არაკონტროლირებად ტერიტორიაზე 10 ჰექტარამდე მიწის ფართობი და მასზე არსებული სახნავ-სათესი მიწები და მოსახლეობის ხეხილის ბაღები მოექცა.
ე.წ. სამხრეთ ოსეთის წარმომადგენლებმა ოკუპირებული ცხინვალის რეგიონის მოსაზღვრე სოფელ დვანის მოსახლეობას სადემარკაციო სამუშაოების განახლების შედეგად ოკუპირებულ ზონაში მოხვედრილ ტერიტორიებზე არსებული მოსავლის ასაღებად თავდაპირველად 10-დღიანი ვადა მისცეს, თუმცა მოგვიანებით წინადადება შეიცავალა და ახალი ბრძანების თანახმად, ადგილობრივებმა მაქსიმალურად მოკლე ვადებში უნდა მოასწრონ საშემოდგომო მოსავლის დაბინავება.