საქართველოს იუსტიციის მინისტრის მოადგილე და სამართალშემოქმედების დეპარტამენტის წარმომადგენლები ვარშავასა და კრაკოვს ეწვევიან და შეხვედრას გამართავენ სისხლის სამართლის დეპარტამენტში. დაგეგმილია სამუშაო შეხვედრა იაგელონის უნივერსიტეტშიც.
ალექსანდრე ბარამიძის განცხადებით, იუსტიციის სამინისტრო აქტიურად მუშაობს „საქართველოს სისხლის სამართლის კოდექსის" ზოგადი ნაწილის რეფორმაზე. ამ პროცესის წარმატებით დასრულებისათვის კი ძალიან მნიშვნელოვანია იმ გამოცდილების გაზიარება, რომელიც ევროპელ კოლეგებს აქვთ კანონმდებლობის გადასინჯვის კუთხით.
"იუსტიციის სამინისტრო უკვე რამდენიმე ხანია სისხლის სამართლის კოდექსის გაუმჯობესებაზე მუშაობს. მიმდინარე წლის ბოლოსთვის ჩვენ უნდა დავასრულოთ მუშაობა სისხლის სამართლის ზოგად ნაწილზე, ხოლო მომავალ წელს დავიწყებთ მუშაობას კერძო ნაწილის გადასინჯვაზე. რა თქმა უნდა, ჩვენ, გარკვეული შეხედულებები უკვე გვაქვს, მაგრამ მიგვაჩნია, რომ არ იქნებოდა ინტერესმოკლებული გვცოდნოდა თუ რა გზას ადგანან ჩვენი უცხოელი კოლეგები. პოლონეთის კოდიფიკაციის კომისიას ანალოგიური ამოცანები გააჩნია - გააუმჯობესოს თავისი ქვეყნის სისხლის სამართლის კანონმდებლობა. შესაბამიად, საკმაოდ წარმომადგენლობითი დელეგაცია იუსტიციის სამინისტროდან, სადაც პროკურატურის, ადვოკატურისა და სამოქალაქო სექტორის წარმომადგენლებიც შედიან, ადგილზე გაეცნობა არსებულ ვითარებას, ნახავს თუ რა ხედვები და მიდგომები გააჩნია ჩვენ კოლეგებს სისხლის სამართლის გაუმჯობესების კუთხით" - განაცხადა ალექსანდრე ბარამიძემ.
„საქართველოს სისხლის სამართლის კოდექსის" სრულად გადასინჯვა 2014 წლის ბოლომდე დასრულდება. რეფორმის ძირეული მიზანი ლიბერალიზაციის სისხლის სამართლის პოლიტიკასა და ადამიანის უფლებების საერთაშორისო სტანდარტებთან შესაბამისობაში მოყვანაა. კოდექსი შესაბამისობაში უნდა
მოვიდეს, აგრეთვე, სამართლებრივი სისტემის სხვა კომპონენტებთან, განსაკუთრებით, ახალ „სისხლის სამართლის საპროცესო კოდექსთან" და იმ სამართლებრივ და სოციალურ განვითარებებთან, რაც სისხლის სამართალზე გავლენას ახდენს ეროვნულ და საერთაშორისო დონეზე.