„საქართველოს ბანკი" სწრაფი გადახდის კომპანიების მიერ გაკეთებული განცხადების საპასუხოდ განმარტავს, რომ „საქართველოს ბანკი" არის იმ მცირე რიცხოვან ოპერატორებს შორის, რომელმაც მომხმარებლის მიზიდვისა და კონკურენციის გაღვივების მიზნით, გადაწყვიტა მომხმარებლისთვის არჩევანის შესაძლებლობა დაეტოვებინა.
"საქართველოს ბანკის" მიერ კონკურენტული გარემოს განადგურებაში დადანაშაულება აბსოლიტურად აზრსაა მოკლებული. ვინაიდან სწრაფი გადახდის თითქმის ყველა ოპერატორმა ერთდროულად დაუწერა მომხმარებელს ერთიდაიგივე ტარიფი. ხოლო „საქართველოს ბანკი" იყო იმ მცირე რიცხოვან ოპერატორებს შორის რომელმაც სწორედაც მომხმარებლის მიზიდვისა და კონკურენციის გაღვივების მიზნით, გადაწყვიტა მომხმარებლისთვის არჩევანის შესაძლებლობა დაეტოვებინა, ანუ მობილური ბალანსის შევსებისას საკომისიო ქონდეთ 0 %-ი. „საქართველოს ბანკს" არაერთხელ განგვიცხადებია, რომ ჩვენთვის საინტერესოა მთლიანად სწრაფი გადახდების სერვისის ეფექტურობა, რაც უნდა მოხდეს მომხმარებლის კმაყოფილების ფონზე და არა ბიზნესის ცალკეული მიმართულების მომგებიანობის კონტროლი"- განმარტავს „საქართველოს ბანკის" წარმომადგენელი სოფო ბალავაძე.
შეგახსენებთ, რომ სწრაფი გადახდის ბაზრის ერთ-ერთი მოთამაშე, კომპანია „ნოვა ტექნოლოჯი" კონკურენტურ გარემოს შექმნას ითხოვს და "საქართველოს ბანკს" დემპინგურ პოლიტიკაში ადანაშაულებს.
„ნოვა ტექნოლოჯიში" აცხადებენ, რომ "საქართველოს ბანკის" სერვისი „ექსპრეს ფეი" იმდენად კარგ პირობებშია ჩაყენებული, რომ კომპანია მას კონკურენციას ვეღარ უწევს.
კომპანიის წარმომადგენლებმა დღეს „პრაიმ ტაიმის" ოფისში გამართულ პრესკონფერენციაზე პრემიერ-მინისტრის, პარლამენტისა და სხვა უწყებების სახელზე მიმართვის ტექსტი გაავრცელეს.
„საქართველოს ბანკი" მიმართავს არამართლზომიერ ქმედებას, რომელიც მიმართულია კონკურენციის შეზღუდვისკენ, არის მონოპოლიურ მდგომარეობაში და მიზნად ისახავს მისი კონკურენტების გაკოტრებას, რაც საბოლოო ჯამში, ნეგატიურად აისახება როგორც ათასობით მეწარმე სუბიექტზე, ისე ქვეყნის ეკონომიკაზე", - აცხადებს „ნოვა ტექნოლოჯი".
მათივე ინფორმაციით, ვინაიდან „საქართველოს ბანკი" მიერ მათ წინააღმდეგ მიზანმიმართულად მიმდინარეობს ბრძოლა დემპინგური ფასებით, „ფინანსურად წამგებიანი და ზარალიანი ოპერაციებით კი, ბაზარზე ექსპანსია და მონოპოლიზიება ხდება. ბანკის მიერ სრულად მონოპოლიზირებულია ასევე თბილისის საზოგადოებრივი ტრანსპორტის გადახდების მიღება. ამის მიზეზი გადახდებზე საქართველოს ბანკისთვის სრული ექსკლუზივის მინიჭების საკითხი გახდა. მოგმართავთ თხოვნით, „თავისუფალი ვაჭრობისა და კონკურენციის შესახებ" კანონში რეალური ცვლილებების შეტანამდე, ვისაც ხელგეწიფებათ იმოქმედოთ კანონმდებლობის შესაბამისად. წინააღმდეგ შემთხვევაში, ამ ბიზნესში მისახედი არაფერი იქნება, რადგან საქართველოს ბანკი იმ დროისთვის ბაზრის ერთადერთი მოთამაშე გახდება", - აღნიშნულია „ნოვა ტექნოლოჯის" განცხადებაში.
