კახეთის 8-ვე რაიონში კოალიცია "ქართული ოცნების" საარჩევნო შტაებებს მასობრივად ტოვებენ. ამის შესახებ "ჯი-ეიჩ-ენს" "დემოკრატიული მოძრაობის" საპრეზიდენტო კანდიდატ ნინო ბურჯანაძის კახეთის რეგიონის კოორდინატორმა ვალერი შოშიაშვილმა განუცხადა და აღნიშნა, რომ ამ დროისთვის "ქართული ცონება" ლაგოდეხის, ყვარლის, საგარეჯოს, გურჯაანის, სიღნაღის, თელავის და ახმეტის რაიონული შტაბების 250-ზე მეტმა აქტიურმა წევრმა დატოვა.
შოშიაშვილის თქმით, "თამამად შეიძლება იმის თქმა, რომ კოალიცია "ქართულ ოცნებას" კახეთის რეგიონში პრაქტიკულად, მთელი ბირთვი გამოეცალა".
"ამ ადამიანების თქმით, მათი მთავარი მოთხოვნის - სამართლიანობის აღდგენის შესრულება ახალმა ხელისუფლებამ ვერ შეძლო. არ ვიცი თბილისში რამდენად შესამჩნევია, თუმცა რეგიონებში ნათლად თვალშისაცემია ის პროცესები, რასაც "ნაციონალურ მოძრაობასთან" კოჰაბიტაცია ჰქვია. "ნაციონალები" ისევ თანამდებობებზე რჩებიან. რეგიონებში ასევე თვალშისაცემია "ქართული ოცნების" და "ნაციონალური მოძრაობის" წარმოამდგენელთა თანამშრომლობა. ხალხი უკვე ნათლად ხედავს, რომ მხოლოდ ნინო ბურჯანაძე შეძლებს ამ პროცესის გამოსწორებას და იგი ნამდვილად ერთადერთი კანდიდატია, ვინც ქვეყანას ამ მდგომარეობიდან გამოიყვანს. ნინო ბურჯანაძეს ადგლობრივი და საერთაშორისო საზოგადოების მხარდაჭერაც აქვს,"- განაცხადა "ჯი-ეიჩ-ენთან" საუბარში ვალერი შოშიაშვილმა.