საქართველოს პარლამენტის თავმჯდომარე დავით უსუფაშვილის განცხადებით, "გარდაცვლილი ექს-პრემიერ ზურაბ ჟვანიას იუბილის აღსანიშნად, დეპუტატებისგან დაკომპლექტებული სპეციალური საორგანიზაციო ჯგუფი შეიქმნება".
როგორც უსუფაშვილმა დღეს პარლამენტის ბიუროს სხდომაზე განაცხადა, აღნიშნულ საორგანიზაციო ჯგუფში როგორც საპარლამენტო უმრავლესობის, ასევე უმცირესობის წარმომადგენელი დეპუტატები შევლენ.
"გთავაზობთ, რომ შეიქმნას კომპაქტური სამუშაო ჯგუფი, ვინც სექტემბრამდე მოიფიქრებს, თუ როგორ და რა ღონისძიებებით აღვნიშნოთ ზურაბ ჟვანიას 50 წლის იუბილე, რომელიც დეკემბერშია. ამ თემაზე კონსულტაციები საპარლამენტო უმცირესობის წარმომადგენლებთან გვქონდა. მე გთავაზობთ, რომ შეიქმნას ჯგუფი, რომელშიც მონაწილეობას ვთხოვდი მიხეილ მაჭავარიანს, ხათუნა გოგორიშვილს, დავით ბერძენიშვილს, ირინა იმერლიშვილს ზურაბ ტყემალაძეს, დავით ონოფრიშვილსაც აქვს სურვილი; ზოგადად, თუ კიდევ ვინმეს აქვს სურვილი, ეს არაა დახურული ჯგუფი და შეუძლია მითხრას. ამის თაობაზე მე გამოვცემ შესაბამის აქტს, რომ ეს ღონისძიება მოვამზადოთ", - განაცხადა დავით უსუფაშვილმა.
შეგახსენებთ, რომ გარდაცვლილ ექს-პრემიერ მინისტრ ზურაბ ჟვანიას წელს, დეკემბერში 50 წელი შეუსრულდებოდა.
