რუსული ტელეკომპანია "რასიას" სპეციალური კორესპონდენტის, ალექსანდრე როგატკინის განცხადებით, "ამერიკელი რესპუბლიკელის რიჩარდ ლუგარის სახელობის სამეცნიერო კვლევით ცენტრში რუსი ჟურნალისტების დღევანდელი სტუმრობა ნაყოფიერი და ინფორმატიული იყო".
მისი თქმით, "რუსული ტელეკომპანიის წარმომადგენლებმა მათთვის და რუსეთის ფედერაციის სანიტარული ზედამხედველობის სამსახურის უფროს გენადი ონიშჩენკოსათვის საინტერესო ყველა კითხვაზე ამომწურავი პასუხი მიიღეს".
" ჩვენ გვითხრეს -"ჩამოდით, ნახეთ, არავითარი საიდუმლო არ არსებობს, რუსეთის საგარეო უწყებას შეშფოთების მიზეზი არ აქვს და არავითარ ბიოლოგიურ იარაღს ჩვენ არ ვამზადებთ". ჩვენ ყველა კითხვას გვიპასუხეს და ეს მშვენიერი ახალი ლაბორატორია დაგვათვალიერებინეს. მე არ ვიცი რა ხდება სინამდვილეში, თუმცა ჩვენ ჩვენს და ონიშჩენკოს სეკითხვებზე პასუხი მივიღეთ,"- განაცხადა ალექსანდრე როგატკინმა.
ლუგარის სახელობის ლაბორატორიაში სტუმრობისას რუსმა ჟურნალისტებმა სპეციალური სიუჟეტიც მოამზადეს, რომელიც რუსეთის ფედერაციის ერთ-ერთი მთავარი ტელეარხის ეთერში სექტემბრის დასაწყისში გავა.
საქართველოს დაავადებათა კონტროლის ეროვნული ცენტრის დირექტორმა ამირან გამყრელიძემ რუს ჟურნალისტებთან საუბრისას, რუსეთის ფედერაციის სანიტარული ზედამხედველობის სამსახურის უფროსს გენადი ონიშჩენკოს საქართველოში ჩამოსვლაც შესთავაზა.
"ახლოს ვიცნობ ბატონ გენადი ონიშჩენკოს. ჩვენ ერთ პერიოდში ვმოღვაწეობდით რუსეთში და საქართველოში ჯანმრთელობის სამინისტროებში. გარდა იმისა, რომ მაღალი დონის პოლიტიკური იერარქიის მქონე პოლიტიკური მოღვაწეა, ამავდროულად იგი მეცნიერია და მას ბევრჯერ შევხვედრივარ. მე მას შევუთვალე, რომ ჩამოსულიყო საქართველოში, ენახა ეს ლაბორატორია და ჩვენთან ერთად დაეთვალიერებინა,"- განაცხადა ამირან გამყრელიძემ.
შეგახსენებთ, რომ რიჩარდ ლუგარის სახელობის საზოგადოებრივი ჯანდაცვის ცენტრალურ-რეფერალური ლაბორატორია რამდენიმე წლის წინ ამერიკლუ მხარის ფინანსური მხარდაჭერით აშენდა.
თბილისის საერთაშორისო აეროპორტის მიმდებარე ტერიტორიაზე აღნიშნული ლაბორატორიის მშენებლობაში ვაშინგტონმა 100 მილიონი დოლარი დახარჯა.
ობიექტის გახსნის ცერემონიას საქართველოს პრეზიდენტ მიხეილ სააკაშვილთან ერთად, ამერიკელი რესპუბლიკელი რიჩარდ ლუგარიც დაესწრო, რომელსაც თან ბირთვული, ქიმიური და ბიოლოგიური პროგრამების განხრით პენტაგონის წარმომადგენელი ახლდა.
ახლადგახსნილი ლაბორატორიის ხელმძღვანელად ანა ჟვანია დაინიშნა, რომელიც 2008 წლამდე დაზვერვის სამსახურს ხელმძღვანელობდა.
ლუგარის ცენტრში ბაქტერიების და ვირუსების ეროვნული საცავიც მდებარეობს. ამ ეტაპზე ლაბორატორიაში ამერიკელი, ბრიტანელი და გერმანელი სპეციალისტები მუშაობენ, თუმცა მეცნიერთა ინტერნაციონალურ სიას რუსი მეცნიერებიც მალე შეუერთდებიან.
ლუგარის სახელობის ლაბორატორია გახსნისთანავე რუსეთის კრიტიკის საგანი გახდა.
ოფიციალური მოსკოვის წარმომადგენელთა განცხადებით, თბილისის საერთაშორისო აეროპორტის მიმდებარე ტერიტორიაზე მდებარე ლაბორატორია რუსეთის ფედერაციას საფრთხეს უქმნის. ამის შეახებ განცხადება მეზობელი ქვეყნის საგარეო უწყებამაც გააკეთა.
ლუგარის ლაბორატორიის თაობაზე ატეხილ აჟიოტაჟს საქართველოში ამერიკის შეერთებული შტაეტების საელჩოც გამოეხმაურა. დიპლომატიური უწყების განმარტებით, ცენტრი არ არის სამხედრო ობიექტი, რომელიც ბიოლოგიური იარაღის შექმნაზე მუშაობს და მგავსი სახით გავრცელებული ინფორმაცია აბსურდულია.
2012 წლის საპარლამენტო არჩევნების შემდეგ, საქართველოს ახალმა ხელისუფლებამ ლაბორატორია დაავადებათა კონტროლის და საზოგადოებრივი ჯანდაცვის ეროვნულ ცენტრს გადასცა.
ცენტრის ხელმძღვანელობის განცხადებით, სპეციალისტები მოლოდ მეცნიერებით არიან დაკავებულნი და ლუგარის ლაბორატორიასთან დაკავშირებით გავრცელებული ხმები, რომ ობიექტი "საიდუმლოს" წარმოადგენს, სიმართლეს არ შეესაბამება.
"ნებისმიერ გასაიდუმლოებულ ინტერპრეტაციას კატეგორიულად გამოვრიცხავთ. არ ვადასტურებთ, რომ ლუგარის ცენტრს სამი მიწისქვეშა სართულიც აქვს, სადაც საიდუმლო კვლევები ტარდება. 2 500 კვადრატული მეტრის ფართობის შენობას უსაფრთხოების მიზეზებიდან გამომდინარე, არც სარდაფი აქვს,"- აცხადებენ ლუგარის სახელობის ლაბორატორიაში.