მარგვეთისა და უბისის ეპარქიის მრევლი 4 სასულიერო პირს საიდუმლო აღსარების გაცემაში და შანტაჟში ადანაშაულებს. ამასთან, ადგილობრივი მრევლი ეპარქიის წინამძღვარ მეუფე ვახტანგს კონკრეტულ ბრალდებებსაც უყენებს.
ერთ-ერთი მრევლის, თეოლოგ კონსტანტინე ქათამაძის განცხადებით, მას გააჩნია დოკუმენტები, რომლის მიხედვითაც ეკლესიის საკუთრებაში არსებული ქონების გაფლანგვაში სასულიერო პირის დანაშაული დასტურდება.
"გამგეობისაგან გამოვითხოვეთ 2011, 2012 და 2013 წლების ხარჯთაღრიცხვის დამადასტურებელი დოკუმენტაცია, თუ რა თანხები იქნა გადარიცხული მარგვეთისა და უბისის ეპარქიის მიზნობრივი ხარჯვის ანგარიშზე ადგილობრივი ბიუჯეტიდან. ასევე, მეორე მხარეს - ეპარქიას მოვთხოვეთ გაწერილი ხარჯთაღრიცხვის დოკუმენტაცია, სადაც არაადექვატურადაა თანხები აღწერილი. იურისტები საკმაოდ წარმატებით ართმევენ თავს იმ საბუთებს, რასაც მომავალში სასამართლო პროცესი მოჰყვება,"- განაცხადა თეოლოგმა კონსტანტინე ქათამაძემ.
მარგვეთისა და უბისის ეპარქიის მრევლმა მათ ხელთ არსებული საბუთები საპატრიარქოს გადასცა, მომავალში კი, მეუფე ვახტანგის წინააღმდეგ სასამართლოში სარჩელის შეტანით იმუქრებიან.
ამავდროულად ისინი ქვეყნის სხვა ეპარქიების მრევლს თანადგომისკენ და პროტესტის მათთან ერთად გამხატვისკენ მოუწოდებენ.