"საქართველოს საზოგადოებრივი მაუწყებლის" სამეთვალყურეო საბჭოს თავმჯდომარე ემზარ გოგუაძის განცხადებით, მაუწყებლის სამეურვეო საბჭო სექტემბრიდან ახალ ფუნქციებს შეითასებს და წლის ბოლომდე მისი შემადგენლობა 13-დან 9-მდე შემცირდება.
ამის შესახებ გოგუაძემ დღეს გამართულ პრესკონფერენციაზე განაცხადა, სადაც საზოგადოებრივი მაუწყებლის სამეთვალყურეო საბჭოს ახალმა ხელმძღვანელმა მაუწყებლის ფუნქციებსა და სამომავლო მიზნებზე ისაუბრა.
"ჩვენ ჩვენი პრიორიტეტებიდან გამომდინარე შეგვიძლია ვიმოქმედოთ და მომავალში განსახორციელებელი მიმარტულებები განვსაზღვროთ. სამეურვეო საბჭოს ფუნქციებიდან ვერ გავალთ, თუმცა მომავალში ჩვენი თანამშრომლობა მუწყებლის მენეჯმენტთან, ძალიან მჭიდრო იქნება,"- განაცხადა ემზარ გოგუაძემ და დასძინა რომ მისი პრიორიტეტები დასავლური ტექნოლოგიებისკენ სწრაფვა და მრჩეველთა საბჭოს საერთაშორისო დონის ექსპერტებით დაკომპლექტება იქნება.
შეგახსენებთ, რომ "საქართველოს საზოგადოებრივი მაუწყებლის" სამეურვეო საბჭოს თავმჯდომარედ ემზარ გოგუაძე გუშინ აირჩიეს.
მაუწყებლის სამეთვალყურეო საბჭოს ახალი თავმჯდომარის არჩევნებს საბჭოს 10 წევრი ესწრებოდა, რომელთაგან გოგუაძის კანდიდატურას მხარი 9-მ დაუჭირა.
"მაუწყებლობის შესახებ კანონში" განხორციელებული საკანონმდებლო ცვლილებების თანახმად, "საზოგადოებრივი მაუწყებლის" სამეურვეო საბჭოს ფუნქციები მნიშვნელოვნად გაიზარდა.
ამასთან, სამეურვეო საბჭო ნაცვლად თვეში ერთხელ შეკრებისა, სხდომებს ყოველ ორშაბათს გამართავს.
ცნობისთვის, "საზოგადოებრივი მაუწყებლის" მოქმედ თავმჯდომარეს ლევან გახელაძეს მისი უფლებამოსილების ვადა პირველ სექტემბერს ეწურება.
