"რაც შეიძლება მალე უნდა დაესვას წერტილი ისეთ სამარცხვინო ფაქტებს, როგორიც ზუგდიდსა თუ სხვა რაიონში ვიხილეთ", _განაცხადა ჟურნალისტებთან იუსტიციის მინისტრმა თეა წულუკიანმა ბათუმსა და ზუგდიდში მომხდარი ინციდენტების კომენტირებისას.
მისივე განმარტებით, მომხდარ ინციდენტს კოალიცია ,,ქართული ოცნება" ემიჯნება.
,, "ქართული ოცნება", როგორც პოლიტიკური კოალიცია და საქართველოს მთავრობა ემიჯნება ამ ფაქტებს, რადგან ოპონენტების მოსაზრების საწინააღმდეგო ახალ ხელისუფლებას არაფერი აქვს. ახალ ხელისუფლებას არაფერი აქვს საერთო ქვების სროლასთან და დემოკრატიულ საზოგადოებაში ნებისმიერ პარტიას, მათ შორის, დღევანდელ საპარლამენტო ოპოზიციას უნდა შეეძლოს თავის მხარდამჭერებს შეხვდეს თავისუფალ პირობებში, ისე, რომ მათ ვინმემ ქვა არ ესროლს", - აღნიშნა წულუკიანმა.
შეგახსენებთ, რომ ბათუმსა და ზუგდიდში ,,ნაციონალური მოძრაობის" ლიდერებს და მხარდამჭერებს კოალიცია ,,ქართული ოცნების" აქტივისტებმა შეურაცხყოფა მიაყენეს, ესროლეს ბოთლები და ქვები. მომხდარ ფაქტთან დაკავშირებით სამართალდამცავებმა რამდენიმე პირი დააკავეს. დაკავებულები სასამართლომ ასლარიანი გირაოს სანაცვლოდ გაათავისუფლა.