„საქართველოს სისხლის სამართლის საპროცესო კოდექსში ცვლილებების შეტანის შესახებ" კანონპროექტთან დაკავშირებით საქართველოს სახალხო დამცველმა უჩა ნანუაშვილმა საკანონმდებლო წინადადებით მიმართა საქართველოს პარლამენტის თავმჯდომარეს დავით უსუფაშვილს.
სახალხო დამცველის წერილში აღნიშნულია, რომ საქართველოს მთავრობის მიერ 2013 წლის 4 ივლისს ინიცირებული ცვლილება მიზნად ისახავს საქართველოს სისხლის სამართლის საპროცესო კოდექსის 332-ე მუხლის პირველი ნაწილის მოდიფიცირებას. ეს არის გარდამავალი დებულება, რომელიც აწესრიგებს გამოძიების ეტაპზე მოწმის დაკითხვისას 1998 წლის 20 თებერვლის სისხლის სამართლის საპროცესო კოდექსით დადგენილი წესის გამოყენებას. დღევანდელი მდგომარეობით გარდამავალ პერიოდად მიჩნეულია 2013 წლის 1 სექტემბერი, კანონპროექტით კი ვადა 2014 წლის 1 დეკემბრამდე გადაიწევს.
სახალხო დამცველს მიაჩნია, რომ საქართველოს პარლამენტმა არ უნდა მოახდინოს აღნიშნული კანონპროექტის მიღება და მხარდაჭერა, რადგან ამ შემთხვევაში საფრთხე შეექმნება საქართველოს კონსტიტუციით დაცულ მრავალ სამართლებრივ სიკეთეს.
"საქართველოს პარლამენტმა მთავრობისგან უნდა მოითხოვოს ზუსტი ვადები, მონაცემები და პირთა რაოდენობა, რომელთა გადამზადებაც უნდა მოხდეს საგამოძიებო ორგანოთა მიერ; ასევე, შესაბამისი მკაცრად გაწერილი გრაფიკი, რათა ზუსტად განისაზღვროს ის თარიღი, თუ როდიდან უნდა მოხდეს მოწმის გამოძიების ეტაპზე დაკითხვის ახალი წესის ამოქმედება. ამ პირობებში საქართველოს პარლამენტი განახორციელებს აღმასრულებელი ხელისუფლების ეფექტურ კონტროლს. ამავდროულად საქართველოს პარლამენტმა ნათლად უნდა გააცნობიეროს და დააფიქსიროს, რომ მოწმის დაკითხვის წესი არ შეიცვლება სამომავლოდ და არ მოხდება ბრალდებულთა დაცვის უფლებრივი მდგომარეობის გაუარესება", - აცხადებს სახალხო დამცველი.
სახალხო დამცველი სთხოვს პარლამენტს, გაითვალისწინოს წარმოდგენილი შენიშვნები და არ მოახდინოს კანონპროექტის მიღება, რომელიც ადგენს გამოძიების ეტაპზე მოწმეთა დაკითხვის წესის გადავადებას.
