ვაღიარებ - დაკავების ფორმა აბსოლუტურად უაზრო იყო: ჯერ დასაკითხად აიყვანეს, შემდეგ გაათავისუფლეს და რამდენიმე საათში ისევ დაიჭირეს, - აცხადებს განათლებისა და მეცნიერების მინისტრის მოადგილე დავით ზურაბიშვილი გაზეთ "ვერსიასთან" საუბარში მერიის თანამშრომლების დაკავებასთან დაკავშირებით. მისი თქმით, დაკავების სპეცოპერაციის ხელმძღვანელები ფორმალური დარღვევებისთვის კანონის წინაშე უნდა დაისაჯონ:
„ეს დაკავება მაინცდამაინც რასმუსენის ვიზიტს რომ არ დამთხვეოდა, მეორე ან მესამე დღეს ვინმე გაგვექცეოდა? ყველაზე მეტად მაინც ის ფაქტი არ მომეწონა, რომ დანაშაულის მტკიცებულებად ბანკომატიდან ფულის მოხსნის პროცესი ვიხილეთ. ეს იდიოტიზმზე მეტია! ბანკომატიდან მეც ვიღებ ხოლმე ხელფასს, მაგრამ ამის გამო დამნაშავედ უნდა გამომაცხადო? საერთოდ, რას გვიჩვენებ ამ კადრებს, ნაციონალური მოძრაობა ხარ?", - აცხადებს ზურაბიშვილი და აღნიშნავს, რომ „იმ ტიპის ქვეყანა არ ვართ, რომ თავს უფლება მივცეთ, ნატო-ს დელაგაციის ვიზიტის პარალელურად, მსგავსი სკანდალი ავაგოროთ, მით უმეტეს, სწორედ იმ დროს, როცა რასმუსენი პოლიტიკური კოჰაბიტაციის აუცილებლობასა და პოლიტიკური დაკავების პრევენციაზე საუბრობდა".
„არაფერს ვაღიარებ, უბრალოდ ვამბობ, რომ დაკავება აბსოლუტურად უაზრო ფორმით განხორციელდა, რამაც მთავარი საქმე გააფუჭა და მერიის თანამშრომლების მიერ ჩაადენილი დანაშაული გადაფარა. ამ ეტაპზე ჩვენთვის დაჭერაზე მნიშვნელოვანი დაკავების ფორმაა და თუ ვიფიქრებთ, რომ მთავარი ვიღაცის დაკავებაა და კანონის ნორმების დაცვა მეორეხარისხოვანია. მერწმუნეთ, მალე "ნაციონალური მოძრაობის" გზას დავადგებით, ამიტომ აუცილებელია დაისაჯოს ის, ვინც ეს გააკეთა. 9 წელიწადი სააკაშვილმა ფილმების ყურებას მიმაჩვია, ამიტომ არ მინდა, მმართველმა გუნდმა კრიმინალური სერიალების ჩვენება გააგრძელოს. კარგი, რა! "ნაციონალური მოძრაობისთვის" სათქმელი არ უნდა მიგვეცა!", - განაცხადა ზურაბიშვილმა.