იარაღის საწყობებში რომ ვიდეოკადრები არ იყო, მე მგონი ყველა ვხვდებით, - ამის შესახებ საქართველოს პრეზიდენტმა, მიხეილ სააკაშვილმა, გორში, ჟურნალისტებს განუცხადა, როდესაც შს სამინისტროს მიერ სამეგრელოში სამალავების აღმოჩენას გამოეხმაურა. პრეზიდენტის განცხადებით, იარაღის საწყობების შექმნაზე მას ნებართვა გაცემული ჰქონდა.
"ვადასტურებ, რომ იარაღის საწყობების შექმნა ჩემი დავალება იყო. იმ ტერიტორიას, რომელსაც ჩვენ ვაკონტროლებდით, ყველგან გავაკეთეთ იარაღის საწყობები. გამაგრებები მეც ნანახი მაქვს. იარაღის საწყობები მომიტევეთ, მაგრამ ნანახი არ მაქვს. მაგრამ, რა თქმა უნდა, ნებართვა მაქვს მიცემული, რომ გაგვეკეთებინა, იმიტომ, რომ ხელახალი აგრესიის განახლების პირობებში, ჩვენ არ უნდა ვყოფილიყავით ისეთი დაუცველი, როგორც ჩვენი ინფრასტრუქტურა იყო 2008 წელს, მთელი ქვეყნის მასშტაბით, მიუხედავად ჩვენი ჯარის გმირული წინააღმდეგობისა. იარაღის საწყობები რომ კეთდებოდა, ამაში - არც ჩემთვის, არც ახალი მთავრობისთვის და არც თავდაცვის სამინისტროსთვის ახალი არაფერია. იარაღის საწყობებში ვიდეოკადრები რომ არ იყო, მემგონი, ყველა ვხვდებით. თუ ვინმეს ხელი წაუცდა კრიმინალზე ყველა უნდა დაისაჯოს", - აცხადებს სააკაშვილი.
პრეზიდენტი უარყოფს, რომ ეს ყველაფერი მასობრივად ხდებდოა. "ჩვენ ვხედავდით, რომ პოლიციაში ათასჯერ უკეთესი სიტუაცია იყო, ვიდრე ოდესმე. ალბათ ვიღაცას წაუცდა ხელი და ყველა ვერ დავსაჯეთ. ყველა მთავრობაში შეიძლება აღმოჩნდნენ ასეთი არამზადები. მთავარია, რომ დროზე მოხდეს გამოვლენა და დასჯა",-დასძინა სააკაშვილმა.
