ეკა ბესელია ბიძინა ივანიშვილის პოლიტიკიდან წასვლას სახელმწიფო ინსტიტუტების გაძლიერების შემდეგ ვარაუდობს. ამის შესახებ ჟურნალისტებთან პარლამენტის ადამიანის უფლებებისა და სამოქალაქო ინტეგრაციის კომიტეტის თავმჯდომარემ ეკა ბესელიამ ბიძინა ივანიშვილის ესტონური გამოცემისთვის მიცემულ ინტერვიუს კომენტირებისას განაცხადა.
,,მნიშვნელოვანია, რომ ხელისუფლებაში მყოფი ასეთი მაღალი თანამდებობის პირი წინამორბედისგან განსხვავებით არ ფიქრობს, რომ მუდმივად დაბღაუჭებული უნდა იყოს თავის მდგომარეობას, თავის სავარძელს. ეს არის კარგი და ჯანსაღი მაგალითი რამდენად დიდია პასუხისმგებლობა პრემიერ-მინისტრის, მაგრამ, დარწმუნებული ვარ, რომ მისი ხელისუფლებაში ყოფნის პერიოდში ჩვენ შევძლებთ შევქმნათ ინსტიტუტები, არა პიროვნებებზე მორგებული ხელისუფლების სხვადასხვა შტო, არამედ ინსტიტუტები რომელიც ძალიან მყარი იქნება", _განაცხადა ბესელიამ.
შეგახსენებთ, რომ ბიძინა ივანიშვილი პოლიტიკიდან წასვლას საპრეზიდენტო არჩევნებიდან რამდენიმე დღის შემდეგ გეგმავს. ამის შესახებ პრემიერ-მინისტრმა ესტონური გამოცემა "Postimees"-თან ინტერვიუში განაცხადა.
„კარგი გუნდი გვყავს, ჩვენს შორის არჩეული იქნება ძალიან საინტერესო პრეზიდენტი, გვყავს პარლამენტის ძალიან კარგი სპიკერი და მაქვს იდეა იმასთან დაკავშირებით, ვინ შეიძლება, ჩემი ადგილი დაიკავოს. არ მსურს და ეს საქართველოში პოლიტიკისთვისაც ძალიან ცუდი იქნება, რომ ფსონი მუდმივად ერთ ადამიანზე კეთდებოდეს. ზემოთ აღნიშნული სამი თანამდებობის გარდა, მჯერა, რომ ყველა მათგანი სუფთა ადამიანებად, დემოკრატებად დარჩებიან. აუცილებელია ასევე დამოუკიდებელი სასამართლო სისტემა, ასევე თავისუფალი მედია. ახალი სისხლია საჭირო", - განაცხადა ივანიშვილმა.