საპარლამენტო უმრავლესობის დეპუტატი კობა დავითაშვილი, საკანონმდებლო ინიციატივით გამოდის,რომლის მიხედვითაც ის, გლეხურ მეურნეობაში პირუტყვის დაკვლის პრაქტიკის დაკანონებას ითხოვს.
დავითაშვილის თქმით, სოფლის მეურნეობის სამინისტრო სოფლებში სარეალიზაციოდ პირუტყვის ხორცის დამზადების პროცესის კონტროლს ვერ ახორციელებს. არსებული პრაქტიკის დაკანონების შემთხვევაში დეპუტატის თქმით, ადგილზე ვეტერინარი უნდა მივიდეს, რომელიც დასაკლავი პირუტყვის მდგომარეობას შეამოწმებს.
ასევე კანონპროექტის მიხედვით თუ ცხოველის რეალიზაციის მიზნით დაკვლის შემთხვევაში არ არის განხორციელებული შესაბამისი ზედამხედველობა, მასზე საჯარიმო სანქცია 100 ლარის ოდენობით განხორციელდება.
კობა დავითაშვილის თქმით, კანონპროექტის მიღების შემთხვევაში ხორცის ფასი 40%-ით შემცირდება. რადგან როგორც დეპუტატი ამბობს, დედაქალაქსა და რეგიონებში ხორცის ფასი განსხვავებულია, რადგან თბილისის ბაზრებზე ხორცი სასაკლაოებიდან ხვდება.