,,ნაციონალური მოძრაობის" ერთ-ერთი ლიდერი გივი თარგამაძე Youtube -ზე გავრცელებული მუქარის შემცველი ვიდეოების წარმომავლობის დასადგენად საპარლამენტო საგამოძიებო კომისიის შექმნას ითხოვს. როგორც პარტიის ოფისში გამართულ პრესკონფერენციაზე ,,ნაციონალური მოძრაობის" წევრმა გივი თარგამაძემ განაცხადა გამოძიება არასასურველი მიმართულებით მიდის.
,,ჩვენ შეგვიძლია, რომ თამამად ჩავთვალოთ, რომ გამოძიება იმ კლიპების წარმომავლობის თაობაზე უკვე გაიწელა დაუსაბუთებლად დიდხანს. გამომდინარე იქიდან, რომ არსებობს საფუძვლიანი ეჭვი, რომ გამოძიება არასასურველი მიმართულებით მიდის და არასასურველ პიროვნებებზე გადის და ამის გამო იწელება, ვაცხადებ, რომ გამოძიებას არ ვენდობი და როგორც დეპუტატი მივმართავ პარლამენტის თავმჯდომარეს მოთხოვნით შეიქმნას საპარლამენტო საგამოძიებო კომისია", _განაცხადა თარგამაძემ.
შეგახსენებთ, რომ გასულ კვირას, Youtube -ზე გავრცელდა ვიდეო, სახელწოდებით - "ჯიჰადი ავღანეთში საქართველოს ჯარების წინააღმდეგ". ვიდეო ISAF-ის მისიაში მონაწილე საქართველოს შეიარაღებული ძალების წინააღმდეგ მუქარას შეიცავს და მასში ქართველი ჯარისკაცები არიან ნაჩვენები. ვიდეოში მიხეილ სააკაშვილისადმიც ისმის მუქარა.