ჩემი გადასაწყვეტი რომ იყოს, ამ სტატიის დამწერს გაზეთს მთლიანად გადავაყლაპებდი, თუმცა ამაზე რეაგირება პოლიტიკოსების საქმეა" - განაცხადა თავდაცვის სამინისტროს გაერთიანებული შტაბის ხელმძღვანელის პირველმა მოადგილემ ვახტანგ კაპანაძემ "ნიუიორკ თაიმსში" გამოქვეყნებული სტატიის კომენტირებისას გადაცემა „აქცენტებში"
"სრული სიბრიყვეა, რაც იქ წერია. ეს რაღაც კამპანიის ნაწილი და ვიღაცის შეკვეთაა. მოსახლეობასთან კონტაქტი მინიმუმადეა დაყვანილი. ზოგჯერ უწევთ ქართველებს დასახლებული პუნქტის ჩხრეკაც, მაგრამ ისინი არც ერთ შემთხვევაში ავღანური პოლიციისა და შეიარაღებული ძალების გარეშე არ მოქმედებენ. სახლებში შესვლა ქართველებს ეკრძალებათ. ამას მხოლოდ ავღანელები აკეთებენ. სტატიაში საინტერესო დეტალია: ქართველებმა ინგლისურიც არ იციანო. უბრალოდ წარმოვიდგინე, რა საინტერესო იქნებოდა ქართველის და ადგილობრივის საუბარი ინგლისურ ენაზე შექსპირის შესახებ. ან ვის მოუვიდა თავში ისეთი საინტერესო მაგალითების მოყვანა, თითქოს ქართველები ართმევენ ავღანელებს ნივთებს, ან რა აქვთ იმ გაჭირვებულებს, რომ ისიც წაართვა, ან რატომ იკადრებს ქართველი ამას და რომც იკადროს რომელიმემ, მთელი პერიმეტრი თვალთვალის ქვეშაა! ამავე დროს, მათთან ერთად ნებისმიერ შემთხვევაში არიან თარჯიმანიც და შეიარაღებული ძალების წარმომადგენელიც. მე საპირისპირო შემთხვევები ვიცი, მაგალითად, როგორ ითვისებენ ადგილობრივი ბავშვები ქართულ ენას, ასევე ადგილობრივი უხუცესების შეკრებაზე ქართული სიტყვებს ხმარობენ ხოლმე, ცდილობენ, პატივისცემა გამოხატონ გურჯების მიმართ, რომლებიც ადგილობრივ ადათებს პატივს სცემენ. ასევე მნიშვნელოვანია, რომ ე.წ. გადასროლის წინ ჯგუფის მეთაურები საგანგებოდ მოწვეული ექსპერტების დახმარებით სწავლობენ ადგილობრივ ადათებს და ქცევის წესებს. ასე, რომ, ეს სტატია ბოღმის ამონთხევა და სისულელეების ერთობლიობაა. ნუთუ ვერავინ მოძებნეს უფრო კომპეტენტური თალიბებში, რომ თუ ამბობდა მსგავს რამეს, უფრო "კომპეტენტური" ტყუილი მოეფიქრებინა?!",- აღნიშნა კაპანაძემ.
