ქუთაისის ინტერვენციული მედიცინის ცენტრში ხელოვნური თირქმლით ჩანაცვლების თერაპიაში ჩართულმა პაციენტებმა, საპროტესტო გამაფრთხილებელი აქცია გამართეს. პაციენტების თქმით დასავლეთ საქართველოს ინტერვენციული მედიცინის ცენტრში უმძიმესი ჰიგიენური სიტუაციაა, რის გამოც პაციენტების უმრავლესობა ჰეპატიტით არის დაავადებული.
„რთულ პირობებში გვიწევს მკურნალობა, აპარატურა რომლითაც დიალიზს ვიკეთებთ მთელი დღის განმავლობაში არ იცვლება და დღის განმავლობაში რამდენიმე პაციენტს ემსახურება. ვითხოვთ ადმინისტრაციამ მოგვაქციოს ყურადღება" განაცხადა ერთ-ერთმა პაციენტმა.
პაციენტების ბრალდებებს „ჯი-ეიჩ-ენთან" საუბრისას ინტერვენციული მედიცინის ცენტრის დირექტორი ანჟელა ორჯონიკიძე უარყოფს, მისი თქმით საავადმყოფოში ჰიგიენური პირობები აბსოლიტურად დაცულია.
