ადვოკატთა საგაფიცვო კომიტეტი, რომელსაც საქართველოს ადვოკატთა ასოციაციის თავმჯდომარე ზაზა ხატიაშვილი თავმჯდომარეობს, საპროტესტო აქციებს იწყებს. ამის შესახებ ადვოკატთა ასოციაციიდან აცნობეს. საგაფიცვო კომიტეტი საქართველოს პარლამენტის მიერ ადვოკატთა უფლებების შეზღუდვას აპროტესტებენ.
„კერძოდ, სისხლის სამართლის საპროცესო კოდექსის 111 მუხლი მე-2 ნაწილის ძველი რედაქციით მიღების ფაქტმა. სისხლის სამართლის საპროცესო კოდექსის 111 მუხლი მე-2 ნაწილში ვკითხულობთ, რომ დაცვის მხარე არ არის უფლებამოსილი, სასამართლოს მიმართოს შუამდგომლობით შემდეგი საგამოძიებო მოქმედებების ჩასატარებლად - ჩხრეკა, ამოღება. საქართველოს მთავრობის მიერ წარმოდგენილი ცვლილებათა პაკეტით გათვალისწინებული იყო ადვოკატის უფლება, მიემართა სასამართლოსთვის შუამდგომლობით ჩხრეკის და ამოღების თაობაზე. შესაბამისად, ამოქმედდებოდა სასამართლოში დაცვის და ბრალდების მხარის თანაწორობის პრინციპი, რასაც ელოდა საქართველოს სამოქალაქო საზოგადოება და ადვოკატთა კორპუსი,"- აცხადებენ ადვოკატთა ასოციაციაში.
"ადვოკატთა კორპუსმა განაცხადა, რომ ვინაიდან ახალმა ხელისუფლებამ გააგრძელა ადვოკატთა უფლებების შეზღუდვა და დევნა, საჭიროა, დაიგეგმოს საპროტესტო ღონისძიებები, რათა მთელმა მსოფლიომ გაიგოს, თუ რა მდგომარეობაშია ქართველ ადვოკატთა კორპუსი. ადვოკატთა მოთხოვნით შეიქმნა საგაფიცვო კომიტეტი, შვიდი ადვოკატის შემადგენლობით, რომლის თავმჯდომარე ადვოკატთა ასოციაციის თავმჯდომარე ზაზა ხატიაშვილი იქნება. საგაფიცვო კომიტეტის შემადგენლობაში ასევე შედიან ადვოკატები _ ირმა ბანძელაძე, თემურ მესხი, მარინე მანგოშვილი, ინგა კუპრავა, ერმილე ჭეიშვილი და ლედი ტუკვაძე. საგაფიცვო კომიტეტის გადაწყვეტილებით საპროტესტო აქციები სამოქალაქო საზოგადოების ყველაზე დიდი მტრის _ პროკურატურის დღეს, 30 მაისს დაიწყება", - ნათქვამია ადვოკატთა ასოციაციის განცხადებაში და იქვე აღნიშნულია, რომ გაფიცვის ფორმებზე და მოთხოვნებზე გადაწყვეტილებას 29 მაისს, ქუთაისში, ადვოკატების შეხვედრაზე მიიღებენ.
