პროგრამის ფარგლებში სმენის აპარატს 200 მოქალაქე მიიღებს, ამ ეტაპზე სამინისტროს მიერ გაცემულია 175 ვაუჩერი. პროგრამის მიმდინარობის პროცესს დღეს აჭარის ავტონომიური რესპუბლიკის ჯანმრთელობისა და სოციალური დაცვის მინისტრის მოადგილე ლევან გორგილაძე გაეცნობა. დღესვე სმენის აპარატს რამდენიმე მოქალაქე მიიღებს.
პროგრამას ტენდერში გამარჯვებული კომპანია „კინდ სმენა" ახორციელებს, ბიუჯეტი 100 000 ლარს შეადგენს.
პროგრამა ითვალისწინებს სმენადაქვეითებულ პირთა ციფრული სმენის აპარატებით უზრუნველყოფას, მორგებას, აპარატის გამოყენებასთან დაკავშირებული სარეკომენდაციო-საკონსულტაციო და ტექნიკური მომსახურების გაწევას, საგარანტიო მომსახურება 12 თვის განმავლობაში.
პროგრამით გათვალისწინებული მომსახურებით სარგებლობენ მოქალაქეები, რომლებიც რეგისტრირებული არიან აჭარის ავტონომიურ რესპუბლიკაში 2013 წლის 1 იანვრის მდგომარეობით.

სმენის აპარატის მიღების უპირატესი უფლებით სარგებლობენ:

1. 18 წლამდე ასაკის ბავშვები; 2. შეზღუდული შესაძლებლობის მქონე პირები; 3. ასაკით პენსიონერები, რომლებიც დარეგისტრირებული არიან სოციალურად დაუცველი ოჯახების ერთიან მონაცემთა ბაზაში 70 000-ის ჩათვლით სარეიტინგო ქულით; 4. ასაკით პენსიონერები, რომლებიც დარეგისტრირებული არიან სოციალურად დაუცველი ოჯახების ერთიან მონაცემთა ბაზაში 70 000-დან 200 000-ის ჩათვლით სარეიტინგო ქულით;
5. ასაკით პენსიონერები;

ვაუჩერის გაცემის საფუძველს წარმოადგენს:

ცნობა ჯანმრთელობის მდგომარეობის შესახებ - ფორმა №IV-100/ა აუდილოგიური გამოკვლევის შედეგით, სადაც მითითებული უნდა იყოს სმენის აპარატის აუცილებლობა;
- პირადობის დამადასტურებელი მოწმობის ასლი ან სხვა დოკუმენტი, რომლითაც შესაძლებელია პირის იდენტიფიკაცია; -ამონაწერი სოციალურად დაუცველი ოჯახების მონაცემთა ერთიანი ბაზიდან (არსებობის შემთხვევაში); -შეზღუდული შესაძლებლობის სტატუსის დამადასტურებელი ცნობის ასლი (არსებობის შემთხვევაში)