დღეს, 17 მაისს, ჰომოფობიის საწინააღმდეგო დღეს გამოსვლას აპირებს ორგანიზაცია „ეროვნული ფრონტიც", თუმცა, ამ შემთხვევაში ისინი არა ჰომოფობიის წინააღმდეგ, არამედ სექსუალურ უმცირესობათა პროპაგანდის, ტირაჟირებისა და რეკლამირებას გააპროტესტებენ. აქცია 09:00 საათზე პარლამენტის შენობის წინაა დაგეგმილი. ამავე ადგილზეა დაგეგმილი ორგანიზაცია „იდენტობას" აქციაც, რომელიც უშუალოდ ჰომოფობიის საწინააღმდეგოდ იქნება მიმართული, თუმცა აქცია-ფლეშმობი 13:00 საათზე იგეგმება.
„მაშინ, როდესაც გრანტებს მოწყურებული და დახარბებული ათასი ჯურის არასამთავრობო ორგანიზაცია ე.წ. სექსუალურ უმცირესობათა უფლების დაცვაზე ზრუნავს, მათ ავიწყდებათ, რომ სწორედ ისინი ემსახურებიან ანიტიჰუმანურ, ანტიადამიანურ და ღვთისსაგმობ მიზნებს. ნაცვლად იმისა, რომ ცოდვაში ჩავარდნილ და გზასაცდენილ ადამიანებს სწორ გზაზე შემობრუნებასა და გარყვნილების ჭაობიდან თავდაღწევაში დაეხმარონ, პირიქით, ისინი ახალისებენ და ხელს უწყობენ ამ ადამიანების სულიერ კვდომას და ცდილობენ ხელი მოითბონ ამ ადამიანების უბედურებაზე",- აცხადებს არასამთავრობო ორგანიზაცია.
მათივე თქმით, მსგავსი საქმიანობა წარმოადგენს ეროვნული უსაფრთხოების საკითხს, რადგან საფრთხე ექმნება ქართველთა მომავალი თაობის ღირსეულად აღზრდას, ქრისტიანულ და ქართულ ეროვნულ ფასეულობებზე დაფუძნებული საზოგადოების მშენებლობას.
"იდენტობის" აქციის გაპროტესტებას გეგმავს კიდევ ერთი ჯგუფი, რომელსაც პოლიტპატიმარი გიორგი გაბედავა ხელმძღვანელობს. ჯერჯერობით უცნობია რა ტიპის საპროტესტო ფორმას მიმართავენ ის და მისი თანამოაზრეები.