ქაშუეთის ეკლესიაში ავღანეთში დაღუპული ქართველი სამხედროების პანაშვიდი მიმდინარეობს. ტაძარში იმყოფებიან როგორც დაღუპული სამხედროების ოჯახის წევრები, ჭირისუფლები და რიგითი მოქალაქეები, ისე თავდაცვის სამინისტროს წარმომადგენლები და შეიარაღებული ძალების სამხედრო მოსამსახურეები.
ავღანეთში ტერორისტების თავდასხმის შედეგად სამი ქართველი ჯარისკაცის დაღუპვის გამო საქართველოში დღეს გლოვის დღეა. ავღანეთის საერთაშორისო მისიაში მონაწილე ქართველი სამხედროების ბაზაზე 13 მაისს, აქამდე ყველაზე მასშტაბური ტერორისტული თავდასხმა განხორციელდა. შემთხვევა ჰელმანდის პროვინციაში, ბაზა "შირგაზზე" 16:17 საათზე მოხდა. ბაზაზე, სადაც 42-ე ბატალიონია დისლოცირებული, თვითმკვლელმა ტერორისტმა და მეამბოხეთა ჯგუფმა იერიში მიიტანა. ძლიერი აფეთქების შედეგად ტერორისტთა 5-კაციანი ჯგუფი ბაზაზე შეიჭრა. ქართველმა სამხედროებმა თავდასხმა მოიგერიეს და ყველა ტერორისტი ადგილზე გაანადგურეს. შეტევის მოგერიებისას დაიღუპნენ კაპრალი ალექსანდრე კვიწინაძე, უმცროსი სერჟანტი ზვიად დავითაძე და კაპრალი ვლადიმერ შანავა.