ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრო დონორებთან ერთად დევნილებისთვის შემოსავლის მომტან წყაროებზე მუშაობას იწყებს. დღეს მინისტრი დავით დარახველიძე საერთაშორისო ორგანიზაციებს, არასმთავრობო სექტორსა და სამთავრობო უწყებების წარმომადგენლებს შეხვდა, სადაც დევნილთა შემოსავლის მომტანი წყაროების სტრატეგია და სამოქმედო გეგმა განიხილეს.
როგორც მინისტრმა აღნიშნა, მიუხედავად იმისა, რომ საერთაშორისო ორგანიზაციების დახმარებით, დევნილებისთვის დაახლოებით 30 000 საცხოვრებელი ფართის რეაბილიტაცია და შექმნა მოხდა, სამინისტროს მხრიდან ნაკლებად ხდებოდა საარსებო წყაროების და სხვა დევნილთა დამხმარე პროგრამების ხელშეწყობა. ეს სფერო მთლიანად მინდობილი იყო არასამთავრობო ორგანიზაციებისთვის.
მინისტრმა ახალ პროექტთან დაკავშირებით ევროკავშირის დიდ წვლილზე გაამახვილა ყურადღება, რომელიც დევნილთა შემოსავლის მომტან წყაროებს 5 მილიონი ევროთი დააფინანსებს. პროექტს კი საჯარო სამართლის იურიდიული პირი (სსიპ) განახორციელებს, რომელიც დევნილთა სამინისტროში შეიქმნება.
"პროექტს ევროკავშირი აფინანსებს 5 მილოინი ევროთი და მსოფლიო ბანკი - 2 მილოინი დოლარით. მათი პირობაა, პროექტი განახორციელოს საჯარო სამართლის იურიდიულმა პირმა (სსიპ-ი). ამისათვის სამინისტროს უახლოეს მთავრობის სხდომაზე გააქვს პროექტი და შეიქმნება სსიპ-ი. დღევანდელი შეხვედრის შედეგად დაიწყება აქტიური მუშაობა ამ პროექტის განხორციელებისათვის. ეს იქნება მრავალ წლიანი პროექტი, რომელიც დევნილი მოსახლეობის სოციალურ და ეკონომიკურ მდგომარეოაბას გააუმჯობესებს" - აღნიშნა დავით დარახველიძემ.
დევნილთათვის შემოსავლის წყაროს მომტანი პროექტების განხორციელების სტრატეგიის შემუშავება ორ ეტაპად განხორციელდება. პირველი ეტაპი ითვალისწინებს სტრატეგიის ჩარჩოს შექმნას, რომელიც მიმდინარე წლის ივლისში დასრულდება.
მასალის გამოყენების პირობები