წუხელ, თბილისში, თამარაშვილის ქუჩაზე მდებარე კლუბ-რესტორან „ლა ფრუტტეში" ინციდენტი მოხდა. კლუბში მყოფ „ნაციონალური მოძრაობის" ლიდერებს რამდენიმე პირთან დაპირისპირება მოუვიდათ. გავრცელებული ინფორმაციით, კლუბში მიხეილ სააკაშვილი და ვანო მერაბიშვილიც იმყოფებოდნენ, თუმცა, მათ თამარაშვილის ქუჩა ინციდენტამდე დატოვეს.
ვრცელდება ცნობა იმის შესახებ, რომ დაშავებულები არიან გიორგი ვაშაძე, ზაზა გოროზია და დავით საყვარელიძე - გოროზიას მკლავი აქვს დაზიანებული, საყვარელიძემ დაზიანებები მკლავზე და სახეზე მიიღო, ხოლო ვაშაძემ - თავის არეში. დაშავებულები რესპუბლიკურ საავადმყოფოში გადაიყვანეს, თუმცა, მათ სტაციონარულ მკურნალობაზე უარი განაცხადეს და ამჟამად საკუთარ სახლებში იმყოფებიან.
უკვე ცნობილია ინციდენტში მონაწილე იმ პირთა ვინაობაც, ვინც „ნაციონალური მოძრაობის" ლიდერებს დაუპირისპირდა. მამუკა ბაკურია, მისი მეუღლე და მაზიაშვილი დარბაზიდან პოლიციელებმა გაიყვანეს. არსებული ინფორმაციით, ერთ-ერთი მათგანიც დაშავებულია. მომხდართან დაკავშირებით, „ნაციონალური მოძრაობა" დღეს საგანგებო განცხადების გაკეთებას გეგმავს.