მსახიობ ოთარ მეღვინეთუხუცესს დიდუბის პანთეონში კვირას, 12 მაისს 15:00 საათზე დაკრძალავენ. ამის შესახებ გადაწყვეტილება თბილისის მერიამ მიიღო. შაბათს, 11 მაისს 20:00 საათზე ოთარ მეღვინეთუხუცესს მარჯანიშვილის თეატრში გადაასვენებენ სადაც სამოქალაქო პანაშვიდი გაიმართება.
შეგახსენებთ, რომ ხანგრძლივი ავადმყოფობის შემდეგ, 81 წლის ასაკში, მსახიობი ოთარ მეღვინეთუხუცესი გარდაიცვალა.
ოთარ მეღვინეთუხუცესი დაიბადა 1932 წლის 16 იანვარს, თბილისში. 1954 წელს დაამთავრა საქართველოს შოთა რუსთაველის სახელობის სახელმწიფო თეატრალური ინსტიტუტის სამსახიობო ფაკულტეტი. იგი იყო საქართველოსა და საბჭოთა კავშირის სახალხო არტისტი, მიღებული აქვს რუსთაველის სახელმწიფო , კოტე მარჯანიშვილის სახელობის და სხვა პრემიები.
ოთარ მეღვინეთუხუცესი მონაწილეობდა ფილმებში: "დათა თუთაშხია", "ფატიმა", "ვედრება", "დიდოსტატის მარჯვენა", "მთვარის მოტაცება, "ნატვრის ხე", "კეთილი ადამიანები", "მზე შემოდგომისა". მას ასევე უამრავი როლი აქვს შესრულებული რუსთავისა და მარჯანიშვილის თეატრებში.