სენაკის საკრებულოში ახალი ფრაქცია "სენაკი და რესპუბლიკელები" შეიქმნა.
"სენაკი და რესპუბლიკელები" საკრებულოს ყოფილმა თავმჯდომარე ბესიკ ნარმანიამ ჩამოაყალიბა და მასში "ნაციონალური მოძრაობის" ყოფილი წევრები შედიან.
"როცა გადავდექი მაშინ ის ფრაქცია დავტოვე და მას შემდეგ შეიქმნა ფრაქცია "სენაკის ხმა". იყო პარტიებთან მოლაპარაკებები, თუმცა საბოლოოდ ჩამოვყალიბდი "რესპუბლიკურ პარტიაში" გაწევრიანებაზე, ხოლო ის ადამიანები, ვინც ჩემს ფრაქციაში არიან, არიან მხარდამჭერები ამ პარტიისა", - განაცხადა "სენაკი და რესპუბლიკელების" თავმჯდომარე ბესიკ ნარმანიამ.
ბესიკ ნარმანიამ, ლევან ჯონირიამ და ტარიელ ერაგიამ ფრაქცია "ნაციონალური მოძრაობა" არჩევნების შემდეგ დატოვეს და ახალი ფრაქცია "სენაკის ხმა" ჩამოაყალიბეს. 1 აპრილს კი, სამანდატო-საპროცედურო კომისიას ფრაქციის სახელწოდების შეცვლის შესახებ აცნობეს.
სენაკის საკრებულოში ამჟამად, 8 ფრაქციაა, რომელთა შორის "ნაციონალური მოძრაობა" აღარ არსებობს, რადგან მისმა წევრებმა სხვადასხვა ფრაქციები შექმნეს.
