დავით დარახველიძემ ევროპის საბჭოს დელეგაციასთან, ევროსაბჭოს გენერალური მდივნის მოადგილის - გაბრიელა ბატაინი-დრაგონის ხელმძღვანელობით, ოფიციალური შეხვედრა გამართა. მხარეებმა იძულებით გადაადგილებილ პირთა მდგომარეობა განიხილეს, მუსულმანი მესხების რეპატრიაციის საკითხებზეც ისაუბრეს და თანამშრომლობაზე შეთანხმდნენ.
ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთ მინისტრმა დავით დარახველიძემ დელეგაციას მოკლედ გააცნო დევნილი მოსახლეობის ძირითადი პრობლემები. აღნიშნა, რომ დარეგისტრირებული 90 000 დევნილი ოჯახიდან (267 000 ადამიანი) 25 00 ოჯახი (130 000 ადამიანი) განთავსებულია დედაქალაქში, 50 000 ოჯახზე მეტი - სამეგრელოს რეგიონში, დანარჩენები კი სხვადასხვა რეგიონაბში. მინისტრის თქმით, ამ ეტაპისთვის საცხოვრებელი ფართით დაკმაყოფილებულია 25 000 ოჯახი.
დავით დარახველიძემ კერძო სექტორში მცხოვრებ დევნილებზეც ისაუბრა და აღნიშნა, რომ 19 წლიანი დევნილობის მიუხედავად, 2007 წლამდე, მათთვის სახელმწიფო სტრატეგია არ არსებობდა. დავით დარახველიძის თქმით: „ჩვენ ავიღეთ უდიდესი ვალდებულება, რომ დევნილთა ძირითადი პრობლემები ჩვენს საარჩევნო ვადაში - 4 წლის განმავლობაში გადავწყვიტოთ."
გაბრიელა ბატაინი-დრაგონი სწორედ დევნილთა ძირითადი პრობლემებით დაინტერესდა და ასევე, მინისტრს ჰკითხა დახმარება რა მიმართულებით არის საჭირო.
მინისტრმა დავით დარახველიძმ მთავარ პრობლემად საცხოვრებელი ფართი დაასახელა და აღნიშნა, რომ ამ ეტაპზე 40 000 დევნილ ოჯახს განსახლების გადაუდებელი აუცილებლობა გააჩნია. დანარჩენ პრობლემებად კი დასაქმება, სოციალური მდგომარება, ჯანმრთელობის პრობლემები და სხვა საკითხები დაასახელა.
ევროპის საბჭოს გენერალური მდივნის მოადგილემ გაბრიელა ბატაინ-დრაგონმა მინისტრს მხარდაჭერა აღუთქვა და ასევე მზადყოფნა გამოხატა საკანონმდებლო კუთხით დახმარებასთან დაკავშირებით.
„ჩვენ მინისტრისგან მოვისმინეთ არსებული პრობლემები. არის პოზიტიური ცვლილებები, გაორმაგდა ბიუჯეტი და სახემწიფოს გააჩნია გეგმა, ამ საკითხების ეფექტურად გადასაჭრელად. მინისტრთან ერთად მივსჯელეთ, რა შეგვიძლია გავაკეთოთ იძულებით გადაადგილებულ პირთა პრობლემების გადასაჭრელად. დევნილთა მდგომარეობა ჯერ კიდევ რთულია და ის სერიოზულ ყურადღებას საჭიროებს. პრობლემების მოგვარებაში ევროპელი პარტნიორები საქართველოს კვლავაც აქტიურად დაეხმარებიან" - აღნიშნა ევროსაბჭოს გენერალური მდივნის მოადგილემ - გაბრიელა ბატაინი დრაგონმა.
შეხვედრას ასევე ესწრებოდა მინისტრის მოადგილე ნინო ჭავჭავაძე და ევროპის საბჭოს წარმომადგენელი საქართველოში კატერინა ბოლონეზე.