ქვეყანაში აზარტული თამაშების რეკლამები შესაძლოა აიკრძალოს. პარლამენტარი კობა დავითაშვილი აზარტული თამაშების წინააღმდეგ გამოდის და საკანონმდებლო ორგანოსგან, აზარტული თამაშების რეკლამირების უარყოფის დაკანონებას ითხოვს.
როგორც კობა დავითაშვილმა სააგენტო „ჯი-ეიჩ-ენთან" საუბრისას განაცხადა, ის პიროვნულად მომხრეა რეკლამა მთლიანად აიკრძალოს და არ მოხდეს ისეთი აკრძალვა, როგორც ეს ვთქვათ ალკოჰოლთან დაკავშირებით ხდება, როდესაც რეკლამირება გარკვეულ საათებშია შესაძლებელი.
„მომხრე ვარ სრული აკრძალვისა, რადგანაც გაუბედურდნენ ოჯახები. ეს აზარტული თამაშები გახდა ავადმყოფობა, რაშიც ჩათრეულნი არიან არასრულწლოვანები. აუტანელი ვითარებაა და ჩემი ამოცანაა, რომ ამ ინდუსტრიას პირდაპირი დარტყმა მივაყენო", - განმარტავს პარლამენტარი.
კობა დავითაშვილი აცხადებს, რომ საკანონმდებლო ინიციატივას მალე უმრავლესობასაც გააცნობს და მხარდაჭერასაც სთხოვს.
„საზოგადოებრივი ინტერესი ბევრად უფრო მაღლად დგას ვიღაცის კერძo ბიზნესინტერესთან შედარებით", - აცხადებს დავითაშვილი.
რაც შეეხება აზარტული თამაშების რეკლამირებიდან შემოსავალს, კობა დავითაშვილის განმარტებით, „შემოსავალი შეიძლება ნარკოტიკების ვაჭრობიდანაც მიღოს სახელმწიფომ, მაგრამ ეს არ ნიშნავს, რომ ნარკოტიკებით ვაჭრობა ლეგალური გავხადოთ".
შეგახსენებთ, რომ ხელისუფლებაში მოსვლისას ბიძინა ივანიშვილმა სათამაშო ბიზნესის წინააღმდეგ სიტყვიერად გაილაშქრა და განმარტა, რომ მისი შეზღუდვა მოხდებოდა. ამის შემდეგ ხელისუფლების მხრიდან გაკეთდა განმარტებები, რომ სათამაშო ბიზნესიდან საბიუჯეტო შემოსავლები მიზერული იყო და აკრძალვა მართლაც ამოქმედდებოდა, თუმცა საბოლოოდ მთავრობამ აკრძალვა როგორც ჩანს გადაიფიქრა.
სასტუმროში განთავსებული კაზინოების მუშაობას პრობლემები აღარ შეექმნება. ეკონომიკისა და მდგრადი განვითარების მინისტრი გიორგი კვირიკაშვილი ამბობს, რომ სასტუმროში განთავსებულ კაზინოებზე, ხელისუფლება არანაირ შეზღუდვებს და და არც გარკვეული ცვლილებები დაწესებას აპირებს. როგორც მინისტრი განმარტავს, სასტუმრო ბიზნესისთვის სათამაშო ბიზნესისც მნიშვნელოვანი სეგმენტია და ამ მიმართულებით ცვლილებები არ იქნება.
„თუ კი ზოგადად სათამაშო ბიზნესის მიმართ რაიმე კონკრეტული ცვლილებები დაიგეგმება, ეს ბიზნეს წინასწარ ეცნობება, რათა მან საკუთარი ბიზნესის გადარჩენა, დანაკარგების გარეშე შეძლოს"- განმარტავს მინისტრი.
აღსანიშნავია, რომ სათამაშო ბიზნესს შიში და გარკვეული სიფრთხილე პრემიერ-მინისტრის ბიძინა ივანიშვილის გამონათქვამების შემდეგ გაჩნდა. აჭარაში ვიზიტისას, ივანიშვილმა სათამაშო ბიზნესის შეზღუდვაზე გაამახვილა ყურადღება. ამის შემდგომ კი მშენებარე სასტუმროებმა, სადაც კაზინოებიც უნდა განთავსებულიყო, მშენებლობის პროცესი სიტუაციაში გარკვევამდე მინიმუმ ერთი წლით შეაჩერეს. აჭარაში, დიდ სასტუმროებში კი ღიად აცხადებდნენ, რომ მათთან თურქი და აზერბაიჯანელი ტურისტების რაოდენობამ იკლო, რადგანაც ისინი ბათუმში დასვენების გარდა სათამაშო ბიზნესისთვისაც ჩადიოდნენ.
