პარიზულ აქციაზე, რომელსაც მემარჯვენე პარტიები, კათოლიკური ეკლესია და მუსულმანური ერთობა უჭერდა მხარს, ათეულ ათასობით ადამიანი მთელი საფრანგეთიდან გამოვიდა. დემონსტრანტებს ხელში საჰაერო ბურთები და ტრანსპარანტები ეჭირათ, ლოზუნგებით: „მამა, დედა - ეს ნორმალურია", „მამა, დედა, ქუჩაში ქორწინების დასაცავად გამოდიან" და სხვა. აქციის მონაწილეებმა პარიზის ცენტრალურ ქუჩებზე სამ კოლონად ჩაიარეს და ეიფელის კოშკამდე მივიდნენ.

პროტესტის მონაწილეების მთავარი მოთხოვნა რეფერენდუმის ორგანიზება გახდა, კანონპროექტის თემაზე, რომლის მიხედვითაც ერთსქესიანი ქორწინების ლეგალიზება მოხდება და ასევე, გეებს ბავშვების აყვანა შეეძლებათ. მიტინგზე ორგანიზატორებმა ოლანდისადმი მიმართვა წაიკითხეს და სთხოვეს, უარი თქვას ამ კანონპროექტზე. ერთ-ერთმა ორგანიზატორმა, პარლამენტარმა ჟან-ფრანსუა კოპემ განაცხადა, რომ ამ აქციამ ოლანდს უნდა დაანახოს საკუთარი მოქალაქეების დამოკიდებულება იმისთან დაკავშირებით, რომ მილიონობით მოქალაქე კანონპროექტის წინააღმდეგია.
პოლიციამ აქციის მონაწილეთა რაოდენობა 340 ათასი კაცით განსაზღვრა, თუმცა, თავად ორგანიზატორები ირწმუნებიან, რომ ქუჩებში 800 ათასი ადამიანი გამოვიდა. ყველა შემთხვევაში, ეს აქცია ერთ-ერთ ყველაზე უმსხვილეს აქციად ჩაითვალა, საფრანგეთის ახალ ისტორიაში.
ცნობილია, რომ მმართველი სოციალისტური პარტია, რომლის სათავეშიც ფრანსუა ოლანდია, მოქალაქეების პროტესტის მიუხედავად, უარს ამბობს კანონპროექტის გადახედვაზე. ოლანდის პრეს-მდივნის განცხადებით, ქორწინება ყველას უფლებაა, ვისაც ერთმანეთი უყვართ. კანონპროექტის მიღება იანვრის ბოლოს იგეგმება, ხოლო ის ძალაში ამ წლის ივნისიდან შევა.