იმ ადამიანთა ვინაობა, ვინც რუსეთში მოლაპარაკებებზე გაემგზავრება უკვე ცნობილია. როგორც სააგენტო „ჯი-ეიჩ-ენთან" საუბრისას, სოფლის მეურნეობის მინისტრმა დავით კირვალიძემ განაცხადა, მოსკოვში უკვე გადაგზავნილია იმ ადამიანთა სია, რომელიც მოლაპარაკებებში მიიღებს მონაწილეობას, თუმცა საბოლოო პასუხს ქართული მზარე მაინც რუსეთიდან ელოდება.
მინისტრის თქმით, მას შემდეგ რაც რუსული მხარე დასტურს განაცხადებს, ამის შემდეგ ვიზების საკითხი იქნება გასარკვევი. დავით კირვალიძე განმარტავს, რომ კარგი იქნება თუ ქართული დელეგაციის ვიზიტი, რუსეთში საქართველოს კათალიკოს-პატრიარქის მოსკოვში ვიზიტს დაემთხვევა, რომელიც მოსკოვში 20 იანვარს ჩადის.
„სია უკვე გადაგზავნილია იმ ადამიანებისა, რომლებმაც ტექნიკურ დეტალებზე უნდა მოილაპარაკონ. პოლიტიკურ დონეზე რამდენიმე განცხადება უკვე იყო, რომ გადაწყვეტილება მიღებულია. დელეგაციაში შევლენ: ღვინის სააგენტოს ხელმძღვანელი, ღვინის ასოციაციის ხელმძღვანელი, ამავე ასოციაციის საბჭოს ხელმძღვანელი, ფიტო-სანიტარულიო კარანტინის ხელმძღვანელი და ასევე ხილისა და ბოსტნეულის ექსპორტ-იმპორტის სააგენტოს ხელმძღვანელი. ეს არის იმ ადამიანთა ჩამონათვალი, რომელიც ზურაბ აბაშიძის მეშვეობით უკვე გადაეგზავნა რუსულ მხარეს", - განუცხადა "ჯი-ეიჩ-ენს" კირვალიძემ.
შეგახსენებთ, რომ გუშინ რუსეთის მთავარმა სახელმწიფო სანიტარულმა ექიმმა, გენადი ონიშენკომ დაუშვა შესაძლებლობა იმისა, რომ საქართველოს მთავრობის წევრებმა რუსეთის ბაზარზე ქართული ღვინისა და მინერალური წყლის დაბრუნების შესახებ მოლაპარაკებებში მონაწილეობა მიიღონ. ინფორმაციას ამის შესახებ რუსული მედია ავრცელებს.
"გაარკვიონ ვინ ჩამოვა და ჩამოვიდნენ. მზად ვარ 20 იანვრამდე მათ შევხვდე. თუ საქართველოს მთავრობა მოისურვებს, რომ ამ დელეგაციის შემადგენლობაში მთავრობის წარმომადგენლები იყვნენ ჩვენ წინააღმდეგნი არ ვართ", _ განაცხადა გენადი ონიშენკომ რუსულ მედიასთან საუბრისას და აღნიშნა "ჩვენ მზად ვართ მათ შევხვდეთ იანვრის მეორე დეკადაშიც კი".
ამასთან, გენადი ონიშენკომ გააკეთა განცხადება იმის შესახებაც, რომ ის უკვე შეხვდა ქართული ბიზნესის ზოგ წარმომადგენელს.
"ჩვენთვის საინტერესო არის, რომ ქართული დელეგაციის შემადგენლობაში იყვნენ ისეთი სტრუქტურის წარმომადგენლები, რომლებსაც სახელმწიფოსაგან მინიჭებული აქვთ უფლება გააკონტროლონ პროდუქციის ხარისხი და უსაფრთხოება. ყოველივე ეს მოსალოდნელ მოლაპარაკებებს უფრო ეფექტურს გახდიდა. ჩვენ შესაძლოა რაღაც ერთიანი პოზიცია გამოგვემუშავებინა - ინფორმაციის გაცვლისა და რუსეთის ბაზარზე შემოსატანი პროდუქციის უსაფრთხოების უზრუნველყოფისა", - განაცხადა გენადი ონიშენკომ.
