დავით კირვალიძე ოზურგეთის რაიონის სოფელ თხინვალში ციტრუსის მწარმოებელ ფერმერებს ხვდება და რეგიონებში მანდარინის რეალიზაციასთან დაკავშირებულ პრობლემებს ადგილზე ეცნობა.
მანდარინის რეალიზაციის პრობლემას რამდენიმე ძირითადი მიზეზი აქვს: პირველი და უმთავრესი გადამამუშავებელი საწარმოების არარსებობაა. ამასთან დაკავშირებით, სოფლისა და სოფლის მეურნეობის განვითარების ახალი ფონდის ფარგლებში, უახლოეს ერთ წელიწადში 60 ახალი საწარმო გაიხსნება. აჭარასა და გურიაში სწორედ ციტრუსის გადამამუშავებელი, სამაცივრე და სასაწყობე საწარმოები გაიხსნება.
პრომლებას წარმოადგენს მოსავლის ხარისხიც - ფერმერთა უმრავლესობას არ ჰქონდა ბაღის სწორად მოვლის, ხარისხიანი სასუქის მიწოდების შესაძლებლობა. საგაზაფხულო პროგრამის ფარგლებში სახელმწიფო ფერმერებს ხარისხიან სასუქს უფასოდ მიაწვდის.
ასევე, ძალიან მნიშვნელოვანია გადაწყვეტილებები ექსპორტთან და ახალ ბაზრებთან დაკავშირებით. სოფლის მეურნეობის მინისტრის განცხადებით, მიმდინარეობს მოლაპარაკებები ტრადიციულ ბაზრებზე ქართული მანდარინის ექსპორტის ხელშეწყობასთან და ასევე, რუსული ბაზრის გახსნასთან დაკავშირებით.
„ეს მუდმივი პროცესია - მოსავლის რეალიზაციისთვის მოსამზადებლად მთელი წელი უნდა ვიმუშაოთ. წელს კი, დაჩქარებული რეჟიმით, მთავრობამ 1 თვეში მოასწრო ცენტრალური ბიუჯეტიდან 2 მილიონამდე ლარის გამოყოფა აჭარასა და გურიაში მანდარინის მწარმოებელთა დასახმარებლად," - აცხადებს დავით კირვალიძე.
სოფლის მეურნეობის მინისტრი გუშინ აჭარაშიც იმყოფებოდა, სადაც ადგილობრივი მეციტრუსეების პრობლემებს ასევე პირადად გაეცნო.
მინისტრის განცხადებით, იანვრის ბოლოს, მისი ინიციატივით, მანდარინის თემაზე ფორუმი გაიმართება, სადაც მთავრობის, აგრარულ სექტორში ჩართული არასამთავრობო ორგანიზაციების და ბიზნეს-სექტორის წარმომადგენლები, ფერმერები და მეცნიერები ერთად განიხილავენ არსებულ მდგომარეობას და დაგეგმავენ დარგის განვითარების ხელშემწყობ ღონისძიებებს.