გერმანელი კინომატოგრაფისტები ანა ფრანკის ცხოვრებაზე ახალ მხატვრულ ფილმს გადაიღებენ. გადაღებები ანა ფრანკის შვეიცარული ფონდის თანადგომით გაიმართება. ჯერჯერობით ფილმის რეჟისორი და მსახიობები შერჩეულნი არ არიან, თუმცა პროექტის ავტორები აცხადებენ, რომ გადაღებები 2013 წელს დაიწყება.
ფილმს საფუძვლად დაედება არა მხოლოდ ანა ფრანკის დღიურები, არამედ სხვა დოკუმენტებიც, რომელიც კავშირშია მის ნათესავებთან. ფილმის სცენარი ფრედ ბრაინერსდორფერს ეკუთვნის. მანვე შექმნა "სოფი შოლის უკანასკნელი დღეების" სცენარიც.
ანა ფრანკის შესახებ არაერთი ფილმია გადაღებული. მათ შორის ყველაზე პოპულარულია 1959 წელს გადაღებული " ანა ფრანკის დღიური" (რეჟისორი ჯორჯ სტივენსონი).
ანა ფრანკი, ებრაელი გოგონა, 1942-1944 წლებში ნათესავებთან ერთად ამსტერდამში იმალებოდა. შემდეგ მისი ოჯახი დააპატიმრეს. იგი საკონცენტრაციო ბანაკში მოხვდა, სადაც 1945 წელს, 15 წლის ასაკში, გარდაიცვალა. 1942-1945 წლებში ანა ფრანკი წერდა დღიურებს, რომელიც მოგვიანებით გამოქვეყნდა.
