დღეს, სოფლის მეურნეობის სამინისტროში სასოფლო-სამეურნეო მიწის მფლობელთა აღრიცხვის პროგრამის პრეზენტაცია გაიმართა.
სოფლის მეურნეობის სამინისტრო საგაზაფხულო პროგრამის ფარგლებში, ადგილობრივ თვითმმართველობის ორგანოებთან კოორდინაციით, სასოფლო-სამეურნეო მიწის მფლობელთა აღრიცხვა-დაზუსტებას იწყებს. დღემდე მოსახლეობის 80%-ს სასოფლო-სამეურნეო მიწები დარეგისტრირებული არ აქვს, რაც საგაზაფხულო ხვნა-თესვის პროცესის დაწყების დამაბრკოლებელია.
კარდაკარის პრინციპით სასოფლო-სამეურნეო დანიშნულების მქონე მიწის თითოეულ მესაკუთრეს სპეციალური ანკეტა დაურიგდება. მიღებული ინფორმაცია შეყვანილი იქნება ელექტრონულ ბაზაში, რაც ხელს შეუწყობს მცირე ფერმერთა დახმარების მიზნით კონკრეტული ღონისძიებების გაწერას.
სოფლის მეურნეობის სამინისტროს თანამშრომლები აქტიურად არიან ჩართული სასოფლო-სამეურნეო მიწების აღრიცხვის პროცესში, რათა დროულად მოხდეს ელექტრონული ბაზის შექმნა და არ შეფერხდეს საგაზაფხულო სასოფლო-სამეურნეო სამუშაოების დაწყება.