20 ნოემბერს, საქართველოს საგარეო საქმეთა სამინისტროში, საგარეო საქმეთა მინისტრმა მაია ფანჯიკიძემ შეხვედრა გამართა საქართველოში საფრანგეთის რესპუბლიკის საგანგებო და სრულუფლებიან ელჩთან, რენო სალენსთან.
შეხვედრის დასაწყისში საფრანგეთის ელჩმა საქართველოს საგარეო საქმეთა ახლადდანიშნულ მინისტრს გადასცა საფრანგეთის რესპუბლიკის საგარეო საქმეთა მინისტრის, ლორან ფაბიუსის, მილოცვის წერილი.
შეხვედრაზე მხარეებმა განიხილეს საქართველოსა და საფრანგეთს შორის არსებული ორმხრივი და მრავალმხრივი ურთიერთობების მნიშვნელოვანი საკითხები, ეკონომიკური თანამშრომლობის პერსპექტივები; ევროკავშირთან და ნატო-სთან საქართველოს ურთიერთობები.
შეხვედრის დასასრულს, საფრანგეთის ელჩმა წარმატებები უსურვა ახლადდანიშნულ მინისტრს და საფრანგეთის მხრიდან მჭიდრო თანამშრომლობა აღუთქვა.