ქართული პროდუქციისთვის რუსეთის ბაზარი გახსნილია, - ამის შესახებ "ჯი-ეიჩ-ენს" საერთაშორისო ინვესტიციების საკოორდინაციო ცენტრიდან აცნობეს.
ცენტრის ინფორმაციით, ორგანიზაციამ თავის რუს პარტნიორებთან ერთად უკვე გაიარა კონსულტაციები რუსეთის შესაბამის ორგანოებთან და ქართული კომპანიების პოტენციურ პარტნიორებთან.
"ქართული ღვინისა და მინერალური წყლის რუსეთში ექსპორტი სათანადო პროცედურების გავლის შემთხვევაში უკვე შესაძლებელია. ჩვენ, საერთაშორისო ინვესტიციების საკოორდინაციო ცენტრის ექსპერტები, მზად ვართ, ნებისმიერ მსურველ კომპანიას გავუწიოთ კონსულტაციები და საჭიროების შემთხვევაში აღმოვუჩინოთ ქმედითი დახმარება წარმოებული პროდუქციის რუსეთის ბაზარზე ექსპორტის დასაწყებად.
საქართველოს ხელისუფლებამ არაერთგზის დააფიქსირა თავისი პოზიცია რუსეთთან ეკონომიკური და ბიზნესურთიერთობების გაღრმავების გარდაუვალი საჭიროების შესახებ.
ქართული მწარმოებელი კომპანიებისთვის მართლაც ძალზე მნიშვნელოვანია რუსეთის ბაზარზე დაბრუნება და ქართული პროდუქციის ექსპორტის განახლება", - განმარტავენ საერთაშორისო ინვესტიციების საკოორდინაციო ცენტრში.
მათი ინფორმაციით, საერთაშორისო სავაჭრო ორგანიზაციაში რუსეთის გაწევრიანების მხარდაჭერა ამ მიმართულებით გადადგმული აუცილებელი, მაგრამ არასაკმარისი ნაბიჯია. აქ ჯერი ქართულ მხარეზეა და ამ საქმეში ინიციატივა საკუთარ თავზე სწორედ საერთაშორისო ინვესტიციების საკოორდინაციო ცენტრმა აიღო.
