საპარლამენტო უმრავლესობა ფრაქციის "ერთობა სამართლიანობისთვის" მიერ სამთავრობო საათის მოთხოვნას ეწინააღმდეგება.
პარლამენტის ბიუროს დღევანდელ სხდომაზე ფრაქციის თავმჯდომარემ დიმიტრი ლორთქიფანიძემ სცადა დაეზუსტებინა, შედგება თუ არა სამთავრობო საათი, სადაც იუსტიციის და შინაგან საქმეთა მინისტრები მიიწვიეს. მისი განცხადებით, 29 მარტს, 2 მინისტრის სამთავრობო საათზე მისვლის შესახებ მოთხოვნა რეგლამენტის თანახმად უკვე დასმულია და 10 კითხვა მინისტრებისადმი უკვე გადაგზავნილია.
ლორთქიფანიძეს საპარლამენტო უმრავლესობის ლიდერი პეტრე ცისკარიშვილი გამოეხმაურა და აღნიშნა, რომ სამთავრობო საათის მოწვევა ფრაქციის მხრიდან არის შოუს მოწყობის მცდელობა პარლამენტში. მისი თქმით, დებატები სულ ახლახან გაიმართა პარლამენტში და ფრაქციის წევრებს მინისტრების მოწვევა ახლა მხოლოდ ერთი ადამიანის წინაშე თავმწონების მიზნით სურთ. შესაბამისად, უმრავლესობა პარლამენტში შინაგან საქმეთა და იუსტიციის მინისტრების მისვლის წინააღმდეგია.
ლორთქიფანიძეს პარლამენტის თავმჯდომარე დავით ბაქრაძეც გამოეხმაურა. მან ბიუროს სხდომაზე დაადასტურა, რომ ფრაქციას პარლამენტში მინისტრების მიწვევის და სამთვრობო საათის დანიშვნის მოთხოვნის უფლება აქვს. ბაქრაძემ პარლამენტის საორგანიზაციო დეპარტამენტს დაავალა, დაადგინონ, შეძლებენ თუ არა ვანო მერაბიშვილი და ზურაბ ადეიშვილი 29 მარტს პარლამენტში გამოცხადებას. მივლენ თუ არა მინისტრები სამთავრობო საათზე, 27 მარტს, პარლამენტის პლენარულ სხდომაზე გახდება ცნობილი.