ბაქო-თბილისი-ყარსის სარკინიგზო მაგისტრალის თურქეთის მონაკვეთის მშენებლობა თითქმის დასრულებულია. თურქული მონაკვეთის მშენებლობაზე 1200 ათასი ადამიანია დასაქმებული. მშენებლობა 24 საათის განმავლობაში მიმდინარეობს, ამის შესახებ განცხადება თურქეთის მმართველი პარტიის წარმომადგენელმა იუნუს კილიჩმა გააკეთა.
"გვირაბის მშენებლობა სარკინიგზო მაგისტრალის ყველაზე რთულ სეგმენტად მიიჩნეოდა. იგი, ფაქტობრივად, უკვე დასრულების სტადიაშია", - განაცხადა დეპუტატმა. დეპუტატმა აღნიშნა ისიც, რომ პროექტი აზიას ევროპასთან აკავშირებს და მისი განხორციელება მნიშვნელოვანია, როგორც თურქეთისთვის, ასევე საქართველოსთვის და აზერბაიჯანისთვის.
გეგმის მიხედვით, ბაქო-თბილისი-ყარსის სარკინიგზო მაგსიტრალი ექსპლუატაციაში 2013 წლის დასაწყისში ან 2012 წლის ბოლოს შევა. ბაქო-თბილისი-ყარსის პროექტში ჩართული მხარეები ვარაუდობენ, რომ მაგისტრალის მეშვეობით წელიწადში 1 მლნ. მგზავრს გადაიყვანენ და 6,5 მლნ. ტონა ტვირთს გადაზიდავენ.
საქართველოსა და თურქეთში გამავალი სარკინიგზო მაგისტრალის მთლიანი სიგრძე 245 კმ-ია. აქედან 175 კმ საქართველოს ტერიტორიაზე გადის, ხოლო 70 კმ რკინიგზა გაივლის თურქეთის ტერიტორიაზე.
ბაქო-თბილისი-ყარსის სარკინიგზო მაგისტრალის პროექტი "ბაქო-თბილისი-ყარსის ახალი სარკინიგზო ხაზის" მშენებლობის შესახებ საქართველოს, აზერბაიჯანისა და თურქეთს შორის გაფორმებული საერთაშორისო შეთანხმების ფარგლებში ხორციელდება და როგორც ინფრატსრუქტურული, ასევე რეგიონული მნიშვნელობის თვალსაზრისით, უმნიშვნელოვანეს პროექტს წარმოადგენს.
