"GIG TAXI"-ი დასაქმების ახალ ეტაპს იწყებს. როგორც სააგენტო „ჯი-ეიჩ-ენთან" საუბარში „GIG TAXI" -ის მმართველმა დირექტორმა კოტე თოფურიამ განაცხადა, კომპანიამ ვაკანსიები გამოაცხადა. საუბარია 50 ვაკანსიაზე და როგორც თოფურია განმარტავს, GIG TAXI"- აიყვანს იმ მძღოლებს, რომელთაც აქვთ სათანადო გამოცდილება, თუმც სასურველი იქნება, თუ კადრებს რომელიმე კომპანიაში მუშაობის გამოცდილება ექნება.
GIG TAXI" -ის მმართველი დირექტორის განმარტებით, ამ დროისათვის ხაზზე 170 ავტომობილი მუშაობს და კომპანიის გეგმაა, რომ აპრილის ბოლომდე აღნიშნული რაოდენობა 250-მდე გაიზარდოს.
როგორც ცნობილია, "GIG TAXI"-ი საწვავად, ძირითადად, აირს იყენებს, რაც მენეჯმენტს საშუალებას აძლევს, ხარჯი 50 %-ით შეამციროს. კომპანიის ხელმძღვანელის განმარტებით, სწორედ ამ გზით კომპანია ახერხებს, ბაზარზე მომსახურეობის საფასური შედარებით დაბალი ტარიფით შეინარჩუნოს. ტაქსოპარკს აქვს საერთაშორისო სტანდარტების შესაბამისი სერვისცენტრი, სადაც ტაქსები გადიან სავალდებული ტექნიკურ დათვალიერებას, ეს კი უზრუნველყოფს მგზავრის უსაფრთხო გადაადგილებას.
ამ დროისთვის "GIG TAXI"-ი მხოლოდ თბილისშია წარმოდგენილი, თუმცა მას შემდეგ, რაც კომპანია ბაზარზე წილს გაზრდის, რეგიონებში სერვისცენტრების გახსნაზედაც იმსჯელებს.
"GIG TAXI"-ს აქვს ექსკლუზიური უფლება თბილისის საერთაშორისო აეროპორტთან, რომლის მიხედვითაც, მგზავრებისა და თავად კომპანია "ტავის" გადაადგილებაზე უშუალოდ "GIG TAXI"-ი ზრუნავს.
კომპანიაში აცხადებენ, რომ კომპანია კლიენტებს მოსახერხებელ გადაადგილებას სთავაზობს თბილისის საერთაშორისო აეროპორტსა და საქართველოს ნებისმიერ რეგიონს შორის. მგზავრებს საშუალება აქვთ, წინასწარ შეუკვეთონ აეროპორტში დახვედრა (ჩამოსვლის, გამგზავრებისას).
შეგახსენებთ, რომ კომპანია "GIG TAXI"-ი არის ტაქსებით მომსახურების წამყვანი კომპანიის, "ქართული საინვესტიციო ჯგუფი XXI"-ს ნაწილი. "GIG TAXI"-ი ქართულ ბაზარზე გამოჩნდა 2007 წელს, როდესაც განახორციელა მნიშვნელოვანი ინვესტიცია ტაქსებით მომსახურების სექტორში. კომპანიამ თბილისში მოღვაწეობა 2007 წლის სექტემბერში 100 ავტომანქანით დაიწყო. მოგვიანებით კომპანიამ შემოიყვანა დაახლოებით 330 მანქანა საქართველოში. 2009 წლის მარტში "GIG TAXI"-ს მიენიჭა "ხარისხის ნიშანი".
