თბილისის სუპერმარკეტებიდან სასურსათო პროდუქციის შეძენა ყველაზე იაფად „გუდვილშია" შესაძლებელი. სუპერმარკეტების შესახებ კვლევაში, რომელიც ილიას სახელმწიფო უნივერსიტეტის ეკონომიკური კვლევების და კონსულტაციის ცენტრმა ჩაატარა, ნათქვამია, რომ ერთი თვის განმავლობაში საშუალო შემოსავლების მქონე ოჯახის სამომხმარებლო კალათისთვის კვლევაში შეტანილი პროდუქციის შესაძენად, „იაფიან სუპერმარკეტებში" 180 ლარია საჭირო, ხოლო „ძვირიან სუპერმარკეტებში" 241 ლარი, ანუ 33,3 %-ით მეტი.
კვლევისათვის კი სამომხმარებლო კალათში შეტანილი პროდუქტებისთვის გამოყენებული იყო და ფასების შედარება მოხდა შემდეგ პროდუქციაზე: შაქარი, ბრინჯი, წიწიბურა, პური (კოლხი),ზეთი (მზიური-პრემიუმი),რძე („სანტე" - 2,5 %), წვენი (ნატურალური. SANDORA-ალუბალი), ყავა (NESCAFE-Classic) და ბორჯომი, შამპანიური (ბაგრატიონი 1882).
ეკონომიკური კვლევების და კონსულტაციის ცენტრის ინფორმაციით, კვლევა მიზნად ისახავდა თბილისში მოქმედ სუპერმარკეტებში სხვადასხვა პროდუქტზე ფასების დადგენას და შედარებით ანალიზს. კვლების შედეგად კი გამოვლინდა ყველაზე დაბალი და ყველაზე მაღალი ფასების მქონე სუპერმარკეტები.
კვლევის ობიექტად შეირჩა როგორც ქსელური, ისე სხვა მსხვილი სუპერმარკეტები. მათ შორის: „გუდვილი", „იოლი გასტრონომია", „პოპული", „ბიგბენი", „ზემელი", „იბისი", „კონტინენტალი" და Express Group. ხოლო გამოსაკვლევად შეირჩა სამომხმარებლო კალათაში შემავალი 20 დასახელების პროდუქტი.
კვლევის თანახმად, იმ სუპერმარკეტებში, რომელებშიც შერჩეული პროდუქტები ყველაზე იაფი ფასით დაფიქსირდა, ლიდერ პოზიციაზე „გუდვილია", ხოლო მეორე და მასემა ადგილებს Express Group და „პოპული" იკავებს.
რაც შეეხება იმ სუპერმარკეტებს, სადაც შერჩეული პროდუქტები ყველაზე მარალი ფასით დაფიქსირდა, ლიდერ პოზიციაზე „ზემელია", ხოლო მეორე და მესამე ადგილზე კი „კონტინენტალი" და „ბიგ-ბენი".