საქართველოში ხორბლისა და ფქვილის გაძვირებას პროგნოზირებენ. გაძვირების პროცესი უკვე დაწყებულია, რადგანაც ამ დროისათვის რუსული ხორბლის ღირებულება 270 დოლარია, მაშინ როდესაც 15 დღის უკან რუსული ხორბლის ფასი 250 დოლარს შეადგენდა. რაც შეეხება ყაზახურ ხორბალს მისი ღირებულება დღეისათვის 250 დოლარს აღწევს. ქვეყანა უკრაინიდან ხორბლის ექსპორტს არ ეწევა, რადგანაც ბოლო პერიოდში რუსული და უკრაინული ხორბლის ფასი გათანაბრდა, ეს იმ ფონზე როდესაც ხარისხით რუსული ხორბალი უკრაინულ ხორბალს ბევრად სჯობნის.
დღეისათვის 1 ტომარა ფქვილის ფასი 32-33 ლარია, ხოლო ერთი კვირის უკან მისი ღირებულება 31 ლარად იყო განსაზღვრული.
ქართველი ექსპერტები აცხადებენ, რომ ხორბლის გაძვირების შესახებ პროგნოზების გაკეთება თებერვლის ბოლოს იქნება შესაძლებელი, მაშინ როდესაც ხორბლის მწარმოებელი ქვეყნები ხორბლის მოსავალს აიღებენ და მარაგებს განსაზღვრავენ. როგორც ცნობილია ყინვებისა და ცუდი მეტეოროლოგიური პირობების გამო ბევრ ქვეყანაში ხორბლის მოსავალი მოიყინა.
იმავდროულად, რუსეთის ხორბლის ექსპორტზე დამატებითი გადასახადის დაწესებას გეგმავს. რუსული მხარის ინფორმაციით, თუ ექსპორტი 25 მლნ. ტონას გადააჭარბებს, მაშინ რუსეთმა შესაძლოა დამატებითი გადასახადი შემოიღოს.ამ ეტაპზე ვარაუდობენ, რომ შესაძლოა მცოცავი გადასახადი იქნეს შემოღებული, რომელიც კომპენსირებას მოახდენს შიდა და გარე ფასებს შორის. ზოგიერთი ანალტიკოსები ვარაუდობს, რომ გადასახადის შემოღება არ მოხდება, რადგანაც ადრე ხორბლის ექსპორტზე კვოტა იყო დაწესებული, თუმც მაშინაც ექსპორტმა 24 მლნ. ტონას ვერ მიაღწია და ქვეყანამ მხოლოდ 19,5 მლნ. ტონა ხორბლის ექსპორტი განახორციელა.
საქართველოში კი ფიქრობენ, რომ რუსული ხორბლის საექსპორტო კვოტა, სავარაუდოდ აპრილში ამოიწურება, რადგანაც რუსი მწარმოებლები მხოლოდ აპრილამდე დებენ კონტრაქტებს, რადგანაც მათი გათვლებით 25 მლნ. ტონაზე ქვეყანა უკვე აპრილში გავა.
ექსპერტი ირაკლი ლექვინაძე მიიჩნევს, რომ რუსული გავლენა ხორბლის ფასებზე აუცილებლად იქნება, რადგანაც რუსეთი ერთ-ერთი უმსხვილესი მოთამაშეა და თუ რუსული ხორბალი გაძვირდა ცხადია, მისი ფასი სხვა ქვეყნებშიც გაიზრდება.
„რუსეთი მსოფლიოს ბაზრის უმსხვილესი მოთამაშეა, შესაბამისად რუსულ ხორბალზე ფასების ზრდა მსოფლიო ფასზე აუცილებლად აისახება. საქართველოში 80% იმპორტირებული ხორბალი შემოდის, მართალია იმპორტი დივერსიფიცირებულია და რუსეთზე დამოკიდებული არ არის, მაგრამ გავლენა აუცილებლად ექნება.
გასულ წელს მსოფლიოში უხვი მოსავალი იყო რაც ფასების შემცირებაზე აისახა კიდეც, მიმდინარე გაძვირება სეზონითაც შეიძლება ავხსნათ, რადგან მარაგები იწურება"- განაცხადა „ჯი-ეიჩ-ენთან" საუბრისას ირაკლი ლექვინაძემ.
აღსანიშნავია, რომ აშშ-ში ხორბალი იაფდება. ბოლო დღეებში რბილი ხორბლის - SRW ფასი 0,92 დოლარით შემცირდა და 236,90 დოლარი შეადგინა. რაც შეეხება მაგარ ხორბალს - HRW კანზა სიტიში 0,92 დოლარით გაიაფდა და ტონაზე 256,28 დოლარი შეადგინა.