მთავრობამ კერძო სექტორთან მორიგი შეხვედრა მოაწყო და 2012 წლის პერსპექტივებზე ისაუბრა. შეხვედრა საქართველოს სავაჭრო სამრეწველო პალატის ორგანიზებით გაიმართა. ძიროითადი თემა იყო “ეკონომიკური პერსპექტივები და პალატა 2012 წელს”. შეხვედრაზე მიწვეული იყო კერძო სექტორის 170-ზე მეტი წარმომადგენელი.
პრემიერ-მინისტრმა ნიკოლოზ გილაურმა დეტალურად მიმოიხილა ქვეყნის ეკონომიკური მდგომარეობა და განაცხადა, რომ 2012 წელი საქართველოსთვის საკმაოდ წარმატებული იქნება, რადგან სწორედ 2012 წელი იქნება ის წელი, როდესაც საქართველოში ინვესტირება საკმაოდ ხელსაყრელი იქნება მსოფლიოს სხვა ქვეყნებისგან განსხვავებით. როგორც პრემიერ მინისტრმა განაცხადა 2012 წელი მსოფლიო ეკონომიკისტვის საკმაოდ მძიმე წელი იქნება. ის უფრო მძიმე იქნება ევროპის ქვეყნებისთვის. 2012 წელს შემცირდება ჩინეთის ეკონომიკური ზრდის ტემპი, შემცირებული იქნება ასევე ამერიკის და სხვა განვითარებული ქვეყნების ეკონომიკის განვითარება. თუმცა 2012 იქნება ის წელი როცა საქართველოში ინვესტირება საკმაოდ ხელსაყრელი იქნება.
პრემიერ-მინისტრა ბიზნესმენებთან შეხვედრისას ხაზი გაუსვა იმასაც რომ საერთაშორისო სარეიტინგო კომპანიებმა მსოფლიოს სხვადასხვა ქვეყნებს რეიტინგები შეუმცირა და სწორედ ამ ფონზე საქართველოს რეიტინგი გაზარდა.
ბიზნესმენებმა მოისმინეს დეტალური პრეზენტაცია განახლებული სავაჭრო პალატის შესახებ, რომელიც პირადად სავაჭრო პალატის პრეზიდენტმა კახა ბაინდურაშვილმა გააკეთა. მან ბიზნესმენებს შესთავაზა ის სერვისები, რომელიც დღეს განახლებულ სავაჭრო პალატას აქვს და განაცხადა, რომ ბიზნესის განვითარებისთვის და ხელშეწყობისთვის პალატაში უკვე მოქმედებს 26 კომიტეტი, რომლებიც სხვადასხვა სექტორსა და სეგმენტს მოიცავს. სულ ბოლოს კი ამოქმედდა ევროკავშირთან ვაჭრობის კომიტეტი, რომელიც ბიზნესს ევროკავშირში ექსპორტის გამარტივებაში შეუწყობს ხელს.
"შეხვედრაზე პრემიერი ესაუბრა ბიზნესის წარმომადგენლბს, თუ რა ეკონომიკურ პერსპექტივებს ხედავს მთავრობა, სად რა ინვესტიციას ელოდება, როგორ ვითარდება საერთაშორისო ეკონომიკაში მოვლენები და როგორ აისახება ის ქართულ ეკონომიკაზე. მთავრობა ბიზნესს ეხმარება, უკეთ დაგეგმოს ბიზნესი წლის განმავლობაში და უკეთესად იმუშაოს პარტნიორებთან, რაც მათ გაუადვილებს ინვესტიციების მოზიდვას”, - განაცხადა სავაჭრო პალატის პრეზიდენტმა კახა ბაინდურაშვილმა.
ბიზნესმენებმა ფინანსთა მინისტრის დეტალური მიმოხილვაც მოისმინეს, რომელმაც კერძო სექტორს საქართველოს მაკროეკონომიკური პარამეტრები გააცნო. დიმიტრი გვინდაძემ მთავრობის პრიორიტეტებზე ისაუბრა და ხაზი გაუსვა, თუ რა დიდი მნიშვნელობა აქვს საერთო მიზნის მისაღწევად კერძო სექტორისა და მთავრობის მჭიდრო კავშირს.
“დიალოგის მიზანია ხელშეწყობა ბიზნესსა და მთავრობას შორის, რათა გადავავლოთ თვალი, თუ რა შეუძლია სახელმწიფოს გააკეთოს. პირველი: მნიშვნელოვანია ის, რომ სტაბილური და მაკროეკონომიკური გარემო შეიქმნას, რაზედაც ვმუშაობთ და რაც, ფაქტობრივად, მიღწეულია. მეორეა კერძო სექტორის განვითარებაზე ორიენტირებული საგადასახადო და საბაჟო პოლიტიკა და ადმინისტრირება, რაზედაც ასევე ვმუშაობთ, მესამე მნიშვნელოვანი საკითხია ლიბერალური სავაჭრო რეჟიმის შექმნა, რათა მწარმოებელს საშუალება მიეცეს, თავისი პროდუქცია გაყიდოს როგორც ადგილობრივ ბაზარზე, ასევე საერთაშორისო ბაზრებზე”, - განაცხადა გვინდაძემ.
როგორც შეხვედრაზე გახდა ცნობილი, სავაჭრო სამრეწველო პალატამ უკვე შეიმუშავა სპეციალური კალენდარი, რომელზედაც დატანილი იქნება საერთაშორისო ფორუმებისა და ტრენინგების შესახებ ინფორმაცია, რომელიც შეჯერებულია საინვესტიციო სააგენტოსთანაც. აღნიშნული კალენდარი უახლოეს პერიოდში კერძო სექტორს დაეგზავნება, რათა მათ წლის განმავლობაში დეტალურად იცოდნენ, რა შეხვედრა იმართება და სად შეუძლიათ მონაწილეობის მიღება.
ბიზნესისა და მთავრობის წევრების შეხვედრა სავაჭრო სამრეწვლო პალატის ორგანიზებით შედგა გასულ წელსაც, როდესაც ბიზნეს სექტორი გაეცნო “მოდერნიზაციისა და დასაქმებისთვის მთავრობის 10-პუნქტიან სტრატეგიულ გეგმას”.
როგორც სავაჭრო სამრეწველო პალატაში განმარტავენ, მსგავსი ტიპის შეხვედრები და ურთიერთთანამშრომლობა მომავალშიც გაგრძელდება და ის ხელს შეუწყობს ბიზნესის უფრო დინამიკურ განვითარებას და ქვეყნის ეკონომიკურ ზრდას.
მასალის გამოყენების პირობები