ბათუმის, ფოთის, სუფსის და ყულევის პორტებში საქართველოს დროშით მცურავი ვისოლის ბუნკირების გემი „ვისოლ ბუნკერინგ"-ი ინოვაციური ტექნიკური საშუალებებით აღიჭურვა და საქართველოში საერთაშორისო რეისების განმახორციელებელ და ტრანზიტული მარშრუტით მოძრავ გემებს საწვავს მსოფლიოში აღიარებული თანამედროვე სისტემით აწვდის.
„ემერსონ"-ის მრიცხველი, რომელიც მსოფლიოში მხოლოდ წამყვან ნავსადგურებში მომუშავე ერთეულ კომპანიებს გააჩნიათ, ვისოლის გემს საშუალებას აძლევს ციფრულად აღრიცხოს საწვავის გაცემისას ტვირთის ტემპერატურა, ხვედრითი წონა, კილოგრამი, ლიტრი და ელექტრონულად გადასცეს ინფორმაცია.
„ინოვაციური ტექნიკური საშუალებები, რომლითაც ვისოლის გემი აღიჭურვა საქართველოში შემომავალი და ტრანზიტული მარშუტით მოძრავი გემების მფლობელებისათვის მნიშვნელოვანი მოტივაციაა გემები საწვავით საქართველოში გამართონ. აღნიშნულ ფაქტს დადებითად გამოეხმაურა მსოფლიოს წამყვანი საზღვაო მედია და ვიმედოვნებთ, რომ ეს ინფორმაცია კიდევ უფრო მიმზიდველს გახდის ქართულ პორტებს." - აცხადებს ვისოლის ბუნკირების დეპარტამენტის ხელმძღვანელი ჯაბა თარიმანაშვილი.
„ვისოლ ბუნკერინგ"-ი 2008 წლიდან სთავაზობს ბათუმის, ფოთის, სუფსის და ყულევის პორტებში შემავალ გემებს საზღვაო საწვავით გემის გამართვის სერვისს. უზრუნველყოფილია რა 1620 ტონის ტევადობის გემით, მომხმარებელს სთავაზობს მაღალი ხარისხის საზღვაო საწვავს კონკურენტუნარიან ფასებში. „ვისოლ ბუნკერინგ"-ის მიერ შეთავაზებული საწვავი რეგულარულად მოწმდება სურვეერული კომპანია SGS-ის ლაბორატორიებში და აკმაყოფილებს საერთაშორისო ISO 8217 სტანდარტებს და MARPOL-ის კონვენციის მოთხოვნებს.