2011 წელს წინა წლებთან შედარებით ექსპორტის მნიშვნელოვანი ზრდა ფიქსირდება. "საქსტატის" ინფორმასციით, 2011 წლის დეკემბერში ექსპორტის ზრდამ წინა თვესთან შედარებით 28 პროცენტი შეადგინა. განსაკუთრებით დიდი ზრდაა 2009 წელთან შედარებით (93 პროცენტი). იმპორტი და საგარეო სავაჭრო ბრუნვაც გაზრდილია სამივე წლის შესაბამისი პერიოდების მიმართ.
აღსანიშნავია, რომ 2011 წელს საქართველოს საქონლით საგარეო სავაჭრო ბრუნვამ (არაორგანიზებული ვაჭრობის გარეშე) 9247 მლნ. აშშ დოლარი შეადგინა, რაც წინა წლის მაჩვენებელზე 36 პროცენტით მეტია; აქედან ექსპორტი 2189 მლნ. აშშ დოლარი იყო (39 პროცენტით მეტი), ხოლო იმპორტი - 7058 მლნ. აშშ დოლარი (34 პროცენტით მეტი). საქართველოს უარყოფითმა სავაჭრო ბალანსმა 2011 წელს 4869 მლნ. აშშ დოლარი შეადგინა (32 პროცენტით მეტი).
"საქსტატის" ინფორმაციით, სავაჭრო დეფიციტის აბსოლუტური მაჩვენებლის ზრდის მიუხედავად, მისი წილი მთლიან საგარეო სავაჭრო ბრუნვაში 2007 წლის შემდეგ ტენდენციურად კლებადია. ამ მაჩვენებელმა ყველაზე დაბალ ნიშნულს 2011 წელს მიაღწია და 52.7 პროცენტი შეადგინა.
სტატისტიკის ეროვნული სამსახურის ინფორმაციით, საქართველოს საგარეო ვაჭრობის გეოგრაფიული არეალი ყოველწლიურად ფართოვდება. 2011 წლისთვის სავაჭრო პარტნიორი ქვეყნების რიცხვმა ისტორიულ მაქსიმუმს მიაღწია და 147 ქვეყანა შეადგინა.