ქვეყანაში ამიერიდან სამომხმარებლო კალათა ყოველწლიურად განახლდება. იმავდროულად, "საქსტატი" "ჰაუს ინიდექსის" დაანგარიშებასაც დაიწყებს. "საქსტატის" ინფორმაციით, თითქმის ყველა განვითარებად ქვეყნაში სამომხმარებლო კალათის განახლება ყოველწლიურად ხდება და 2012 წლიდან ანალოგიური პროცესი საქართველოშიც განხორციელდება. ქვეყანაში ბოლოს კალათა 2010 წელს განახლდა. განახლებული სამომხმარებლო კალათა 288 პროდუქტს მოიცავს, მაშინ როდესაც 2010 წლის სამომხმარებლო კალათა 266 პროდუქტს მოიცავდა.
"საქსტატის" აღმასრულებელი დირექტორის ზაზა ჭელიძის განცხადებით, 2012 წელს სამომხმარებლო ფასების ინდექსის შესადგენად გამოყენებული იქნება, შინამეურნეობის დანახარჯების უახლესი სტრუქტურა, ახლებურად განისაზღვრა ასევე წონები, მოხდა საერთაშორისოდ აღიარებული საუკეთესო პრაქტიკის დანერგვა და "ევროსტატისა" და სსფ-ს რეკომენდაციების გათვალისწინება.
"განახლებული სამომხმარებლო კალათა მნიშვნელოვანია იმ კუთხით, რომ გამოყენებული იქნა შინამეურნეობის უახლესი დანახარჯები და გარდა ამისა ეროვნული ანგარიშების მოხმარების სტრუქტურა. ეს არის ძირითადი რეკომენდაცია "ევროსტატის", "საერთაშორისო სავალუტო ფონდისა" და შვედეთის სტატისტიკის სამსახურის"- აღნიშნა ზაზა ჭელიძემ.
"საქსტატის" აღმასრულებელი დირექტორის მოადგილე თენგიზ ცეკვავა კი აცხადებს, რომ 2010 წელს სამომხმარებლო კალათა დაფუძნებული იყო რეგიონების ქალაქების დანახარჯების სტრუქტურაზე, ხოლო ქალაქის წონა განისაზღვრებოდა მოსახლეობის რაოდენობის მიხედვით. 2012 წლის სამომხმარებლო კალათა მოიცავს მთლიანი რეგიონის დანახარჯების სტრუქტურას და რეგიონების წონა განსაზღვრულია რეგიონში გაწეული დანახარჯის მოცულობის მიხედვით.
ცეკვავას განმარტებით, 2010 წელს სამომხმარებლო კალათის შედგენისას გამოყენებული იყო შინამეურნეობების ინტეგრირებული გამოკვლევები, ხოლო 2012 წელს გამოყენებულია ეროვნულ ანგარიშთა სისტემის 2010 წლის მონაცემები.
აღსანიშნავია, რომ მონაცემთა შეგროვებისათვის და საველე სამუშაოებისათვის "საქსტატის" თანამშრომლები მთლიანად პორტატულ კომპიუტერებს გამოიყენებენ.
"წინა სამომხმარებლო კალათასთან შედარებით ერთეულის რაოდენობა გაზრდილია, რადგანაც 2010 წლის სამომხმარებლო კალათა 266 პროდუქტისგან შედგებოდა. 2012 წლიდან კი კალათა გაიზარდა და ის 288 პროდუქტს მოიცავს. თუმცა ეს არ ნიშნავს, რომ პროდუქციის ჩამონათვალის გაზრდა მოხდა, რადგანაც ზოგიერთი პროდუქტი ამოვარდა და ეს ძირითადად იყო წვრილი პროდუქტები, რომლებსაც დანახარჯების ახალ სტრუქტურაში აღარ აქვს წონა. მნიშვნელოვანი პროდუქტი, რომელიც კალათიდან ამოვარდა ეს არის ბინის გაყიდვის ღირებულება. ეს ძალიან მნიშვნელოვანი მეთოდოლოგიური ცვლილებაა, რადგანაც სხვა ბევრ ქვეყანაში ბინის გაყიდვის ღირებულება სამომხმარებლო კალათაში არ არის. ის ითვლება ცალკე და "საქსტატი" გეგმავს, რომ ბინები და საცხოვრებელი ინდექსი "ჰაუს ინიდექსი" ცალკე დაითვალოს. ახალ სამომხმარებლო კალათას გართობისა და დასვენების ჯგუფში ცალკეული პროდუქტები დაემატა, ასევე გაზრდილია ცალკეული სასურსათო პროდუქტი მაგალითად საღეჭი რეზინი და იოგურტი"- განუცხადა "ჯი-ეიჩ-ენს" თენგიზ ცეკვავამ.
