17-18 იანვარს ავსტრიაში, საერთაშორისო ბიზნეს კონფერენციების ერთ-ერთი წამყვანი ორგანიზატორის Euromoney-ის მიერ ცენტრალური და აღმოსავლეთ ევროპის მე-17 ყოველწლიური ფორუმი იმართება. ფინანსთა სამინისტროს ინფორმაციით, აღნიშნულ ფორუმზე ერთ-ერთ მთავარ გამომსვლელად მიწვეულია საქართველოს ფინანსთა მინისტრი დიმიტრი გვინდაძე. ფორუმს ესწრებიან მსხვილი ინსტიტუციონალური ინვესტორების და სამთავრობო და ბიზნეს წრეების მაღალი რანგის წარმომადგენლები, საერთაშორისო საფინანსო ინსტიტუტები, ფინანსთა მინისტრები, ცენტრალური ბანკების მმართველები და ცნობილი ეკონომისტები.
ფორუმის მონაწილეები იმსჯელებენ ევროპის მომავალი ეკონომიკური და პოლიტიკური განვითარების პერსპექტივებზე ევროზონაში მიმდინარე პროცესების გათვალისწინებით. გაიმართება დისკუსია რეგიონში ფისკალურ ტენდენციებზე, ოპტიმალურ ფისკალურ პოლიტიკაზე და საჯარო ფინანსების მართვაზე, კერძო და საბანკო სექტორების მხარდაჭერის ოპტიმალურ მიდგომებზე, ინვეტიციების შესაძლო ახალ წყაროებზე, სახელმწიფო ვალის მართვის საუკეთესო პრაქტიკაზე და სხვა აქტუალურ თემებზე.
Euromоnеy-ის ფორუმის ფორმატში, საერთაშორისო ინვესტორებისა და მაღალი რანგის სამთავრობო წარმომადგენლების მონაწილეობით გაიმართება სპეციალური მრგვალი მაგიდა, სადაც საქართველოს ფინანსთა მინისტრი წარსდგება მოხსენებით საქართველოს ეკონომიკაზე, ქვეყანაში არსებულ ბიზნეს კლიმატზე და საინვესტიციო შესაძლებლობებზე. დიმიტრი გვინდაძე ისაუბრებს საქართველოში არსებული მაკრო-ფისკალური სტაბილურობის და დინამიური ეკონომიკური ზრდის თაობაზე, გატარებულ სტრუქტურულ რეფორმებზე და ქვეყნის სარეიტინგო მაჩვენებლების გაუმჯობესებაზე.
ამგვარი ფორმატის შეხვედრა კარგი შესაძლებლობაა, მსხვილ საერთაშორისო ინვესტორებს მიეწოდოს სრულყოფილი ინფორმაცია საქართველოს ეკონომიკური წარმატებების შესახებ. აღნიშნული დიალოგი ხელს შეუწყობს უცხოური ინვესტიციების მოზიდვას და ზოგადად, საქართველოს მიმართ ინტერესის შემდგომ წახალისებას.
ვიზიტის ფარგლებში, შედგება ფინანსთა მინისტრის საქმნიანი შეხვედრები Euromоnеy-ს მმართველ დირექტორთან და მსხვილ საერთაშორისო ბანკებთან (HSBC, Deutsche Bank, CitiBank, BNP Paribas). ასევე იგეგმება ფინანსთა მინისტრის ინტერვიუ წამყვან ბიზნეს არხთან Bloomberg-თან.
Euromоnеy-ის კონფერენცია მსოფლიოში წამყვანი ფორუმია მსხვილი საერთაშორისო ინვესტორებისთვის, კორპორაციებისთვის, სამთავრობო და ფინანსური წრეებისთვის. ყოველ წელს ფორუმი მასპინძლობს 1000-ზე მეტ მონაწილეს. კონფერენცია სხვადასხვა ქვეყნების წარმომადგენლებისთვის, ბიზნესისთვის - გამოცდილების გაზიარებისა და ახალი კონტაქტების დამყარების შესაძლებლობას იძლევა.