სამეწარმეო საქმიანობისათვის საქონლის სასაქონლო ზედნადების გარეშე ტრანსპორტირება 1 000 ლარით დაჯარიმდება. როგორც დღეს ფინანსთა მინისტრის მოადგილემ რუსუდან კემულარიამ გამართულ ბრიფინგზე განაცხადა, "საგადასახადო კოდექსში" შეტანილი ცვლილების მიხედვით, სამეწარმეო საქმიანობისათვის საქონლის სასაქონლო ზედნადების გარეშე ტრანსპორტირება, ნაცვლად ცვლილებამდე არსებული სანქციისა, რომლის ოდენობასაქონლის საბაზრო ღირებულებით განისაზღვრებოდა, - იწვევს პირის დაჯარიმებას 1,000 ლარის ოდენობით.
ფინანსთა სამინისტროს ინფორმაციით, 2011 წლის სექტემბერში გადასახადის გადამხდელი - ახორციელებდა 6002 ლარის საქონლის გადაზიდვას სასაქონლო ზედნადებით, რომელშიც არასწორად იყო მითითებული დოკუმენტის შედგენის თარიღი და საქონლის ღირებულება. აღნიშნულ ფაქტზე შედგა საგადასახადო სამართალდარღვევის ოქმი და გადამხდელს, საგადასახადო კოდექსის 286-ე მუხლის პირველი ნაწილის შესაბამისად, სანქციის სახით განესაზღვრა ჯარიმა 6002 ლარის ოდენობით. აღნიშნული გადაწყვეტილება გასაჩივრებულ იქნა ფინანსთა სამინისტროს სისტემაში.
რუსუდან კემულარიას განმარტებით, საგადასახადო კოდექსში 2011 წლის დეკემბერში შესული ცვლილების თანახმად, თუ საგადასახადო დავის განხილვის დასრულებამდე კანონით გაუქმებულია ან შემსუბუქებულია პასუხისმგებლობა ასეთი ქმედების ჩადენისათვის, დავის განმხილველი ორგანო უფლებამოსილია გამოიყენოს ახალი კანონით დადგენილი ნორმა.
მინისტრის მოადგილის განმარტებით, ფინანსთა სამინისტროსთან არსებული დავების განხილვის საბჭოს მიერ განხილულ იქნა მომჩივნის - საჩივარი და საბჭოს მიერ მიღებული გადაწყვეტილების შესაბამისად, გადამხდელისთვის დაკისრებული ჯარიმა, რომელიც კონკრეტული მეწარმისათვის 6002 ლარით იყო განსაზღვრული, 1000 ლარამდე შემცირდა.