კომერციულ ბანკებს საგადახდო მომსახურების განხორციელების ფუნქცია დაემატა.
აღნიშნულის შესახებ ცვლილბები "კომერციული ბანკების შესახებ" კანონში შედის, რომლის თანახმად კომერციული ბანკებისათვის ნებადართულ საქმიანობის ჩამონათვალს საგადახდო მომსახურების განხორციელება, საგადახდო სისტემის ოპერირება და ანგარიშსწორების აგენტის ფუნქციების შესრულება ემატება.
აღსანიშნავია, რომ ცვლილება "საგადახდო სისტემისა და საგადახდო მომსახურების შესახებ" კანონპროექტიდან გამომდინარეობს, რომელშიც განმარტებულია, რომ საგადახდო სისტემა არის ფულადი სახსრების საგადახდო სისტემა, ფასიანი ქაღალდებით ანგარიშსწორების სისტემა და/ან კლირინგის სისტემა.
ცვლილბების მიხედვით, ანგარიშსწორების აგენტი არის იურიდიული პირი, რომელიც უზრუნველყოფს სისტემის მონაწილეებს ანგარიშსწორების ანგარიშებით, რომელთა მეშვეობით ხდება ანგარიშსწორება მონაწილეთა შორის სისტემაში შესრულებული ტრანსფერ ორდერების საფუძველზე.
ანგარიშსწორების აგენტი შეიძლება იყოს საქართველოს ეროვნული ბანკი, კომერციული ბანკი, ან სხვა იურიდიული პირი რომელიც კანონმდებლობის შესაბამისად უფლებამოსილია განახორციელოს ფასიანი ქაღალდების ანგარიშების გახსნა და მომსახურება.