კომპანია „რომპეტროლ საქართველოს" ახალი გენერალური დირექტორი ჰყავს. დღეს, 10 იანვარს, 19.00 საათზე, სასტუმრო „რედისონში", თანამშრომლებსა და ჟურნალისტებს ახალ ხელმძღვანელს ნურკენ მურზაგალიევს (Nurken Murzagaliyev) კომპანიის სათაო ოფისის ვიცე-პრეზიდენტი ერჟან ორინბასაროვი (Yerzhan Orynbassarov) წარუდგენს. ერჟან ორინბასაროვი საგანგებოდ ამ მოვლენისთვის თბილისში ბუქარესტიდან ჩამოფრინდება.
ცვლილება მენეჯმენტის როტაციის ფარგლებში ხორციელდება. ნურკენ მურზაგალიევი „რომპეტროლ საქართველოს" გენერალური დირექტორის პოსტზე ალექსანდრე ალბინს ჩაანაცვლებს.
ნურკენ მურზაგალიევს ნავთობის ბიზნესში სოლიდური გამოცდილება გააჩნია. ყაზახეთის 4 დასავლურ რეგონში ბენზინგასამართი სადგურების რამდენიმეწლიანი ხელმძღვანელობის შემდეგ, მან კიდევ ორი წელი „რომპეტროლ ბულგარეთ"-ში იმუშავა.
რაც შეეხება ალექსანდრე ალბინს, იგი საქართველოში რომპეტროლს 2,5 წელი ხელმძღვანელობდა. ამ პერიოდის განმავლობაში საქართველოს ბიუჯეტი კომპანიამ 170 მილიონი ლარით შეავსო. ალექსანდრე ალბინი საქართველოდან წასვლის შემდეგ „რომპეტროლ ბულგარეთის" გენერალური დირექტორის პოსტს დაიკავებს.
ტრანსნაციონალური კომპანია "რომპეტროლი" საქართველოს ბაზარზე ექვს წელიწადზე მეტია მოღვაწეობს და სადღეისოდ ქვეყნის ნავთობბაზარზე ევრო სტანდარტის საწვავის უმსხვილეს მომწოდებელს წარმოადგენს."რომპეტროლ ჯგუფის" მთავარი ოფისი ამსტერდამში მდებარეობს და ამჟამად მსოფლიოს 20 ქვეყანაში 50-მდე კომპანიას აერთიანებს.
