2011 წლის ენერგეტიკულ წელს ენერგეტიკისა და ბუნებრივი რესურსების სამინისტროში დადებითად აფასებენ. როგორც სააგენტო „ჯი-ეიჩ-ენს" სამინისტროდან აცნობეს, ჰიდროენერგეტიკაში 2011 წელს სამინისტროს მთავარი გამოწვევა ახალი ჰესების მშენებლობების დაწყება, სექტორში ინვესტიციების მოზიდვა და სამუშაო ადგილების შექმნა იყო. მიმდინარე წელს 22 ჰესის პროექტის განხორციელებაზე გაფორმდა ხელშეკრულება. მათგან 9 ჰესის მშენებლობა უკვე მიმდინარეობს, ხოლო დანრჩენების დასრულება 2017 წლისათვის იგეგმება, რაც ითვალისწინებს დამატებით 1,900 მგვტ-ი სიმძალვრის შექმნასა და 3 მილიარდი აშშ დოლარის ინვესტიციის ჩადებას.
2011 წელს ლენტეხი-მესტიის მიმართულებით აშენდა 110 კილოვოლტიანი ელექტროგადამცემი ხაზი, რომელიც ექსპლუატაციაში წლის ბოლომდე შევა. აღნიშნული ხაზი მესტიისათვის 20 მგვტ დამატებითი სიმძლავრის მიწოდებას ემსახურება, რაც მაღალმთიანი რეგიონის ელექტრომომარაგებას მნიშვნელოვნად გააუმჯობესებს.
2011 წელს „საქართველოს საერთაშორისო ენერგეტიკულმა კორპორაციამ" კახეთში, 6 მეგავატიანი „ალაზანი ჰესი 1"-ის რეაბილიტაცია დაასრულა. გარდა ამისა, აშშ-ის საერთაშორისო განვითარების სააგენტოს (USAID) დაფინანსებით, სვანეთში, სოფელ შენაქოში 50-კილოვატი სიმძლავრის მცირეჰიდროელექტროსადგური "შენაქოჰესი' აშენდა, რომელიც ახლად აშენებულ გადამცემ ქსელთან ერთად სოფლის 60-მდე ოჯახს ელექტროენერგიით ამარაგებს.
