2012 წელს ენერგეტიკის და ბუნებრივი რესურსების სამინისტროს პრიორიტეტი ისევ ახალი ჰიდროელექტროსადგურების მშენებლობა, ენერგოსექტორში დამატებითი ინვესტიციების მოზიდვა და სამუშაო ადგილების შექმნა იქნება. ასევე გაგრძელდება იმ პროექტებზე მუშაობა, რომლებიც სამინისტრომ მიმდინარე წელს დაიწყო.
სამინისტროს ინფორმაციით, მომავალ წელს 15 ახალი ჰესის მშენებლობას ჩაეყრება საფუძველი. მათ შორის, დაგეგმილია ყველაზე მსხვილი „ნამახვანის ჰესების კასკადისა" და „ნენსკრა ჰესის" მშენებლობის დაწყება. აღნიშნული პროექტების განხორციელების შედეგად, ენერგოსექტორში 3,573 მლრდ აშშ დოლარის ინვესტიცია ჩაიდება, შეიქმნება 2087 მგვტ-ის დამატებითი სიმძლავრე, ხოლო განსახორციელებელ სამუშოებზე 12 800 ადამიანი დასაქმდება.
გარდა ამისა, 2012 წელს ექსპლუატაციაში შევა თურქეთთან დამაკავშირებელი მაღალი ძაბვის გადამცემი ხაზი და 350 მეგავატი სიმძლავრის მუდმივი დენის ჩანართი. „სენაკი 1 და2" ელექტროგადამცემ ხაზის პროექტის მოსამზადებელი ეტაპი დასრულდება და უშუალოდ სამშენებლო სამუშაოები დაიწყება. ასევე დასრულდება საქართველო-აზერბაიჯანის დამაკავშირებელი ახალი 500 კვ ელექტროგადამცემი ხაზის 10 კმ-იანი მონაკვეთის მშენებლობა და ხაზის პარალელურად, მიმდინარე #1-36 ანძებს შორის არსებული 9,7 კმ-იანი მონაკვეთის რეაბილიტაცია. მომავალ წელს დაგეგმილია მესტიის ელექტრომომარაგების პროექტის ფარგლებში ახალი ქვესადგურების მშენებლობის დასრულება.
გაგრძელდება სომხეთთან დამაკავშირებელი 400 კილოვოლტიანი ელექტროგადამცემი ხაზის საპროექტო დოკუმენტაციის მომზადება და მშენებლობის მოსამზადებელი სამუშაოები. ექსპლუატაციაში შევა „ენგურჰესის" N1 ჰიდროაგრეგატი და N5 ჰიდროაგრეგატის რეაბილიტაცია.2012 წელს დაიწყება „ვარდნილჰესების კასკადის", გამყვანი არხისა და კაშხლის რეაბილიტაცია და ახალი მაღალი ძაბვის გადამცემი ხაზის ადიგენი-ბეშუმის მშენებლობა.
დღეისათვის რეგიონის მოსახლეობის ნახევარზე მეტს და მონტაჟებული აქვს ინდივიდუალური მრიცხველი. გამრიცხველიანება 2014 წლისათვის დასრულდება. 2012 წელს ინდივიდუალურად დამატებით 150 ათასი ოჯახი გამრიცხველიანდება.
საპრეზიდენტო პროგრამის „გაზი ყველა სოფელს" 2015 წლისთვის მთელი ქვეყნის მასშტაბით, სოფლების 75% ბუნებრივი აირით მომარაგდება. ამ ეტაზე გაზიფიცირებულია რეგიონებში მაცხოვრებელი მოსახლეობის დაახლოებით 42% - 390 ათასი ოჯახი. 2012 წელს დამატებით 80 ათასი ოჯახის გაზიფიცირებაა დაგეგმილი.
რაც შეეხება გაზსადენებს, მომავალ წელს დაიწყება სენაკი - ქუთაისი 80 კმ მონაკვეთისა და საგურამო - ქუთაისის 200 კმ მონაკვეთის რეაბილტაცია.დაგეგმილია არსებული 500 მმ-იანი მილსადენის (50 კმ) ახალი 700 მმ-იანი მილსადენით შეცვლა;ასევე, დაიწყება ვალე-ვანის ახალი 700 მმ მილსადენის პროექტირებისა და სხვა მოსამზადებელი სამუშაოები, ნავთლუღი - საგურამოს გაზის 700 მმ-იანი 38 კმ მილსადენის, ტაბაწყური - ბაკურიანის გაზის 300 მმ-იანი 18 კმ მილსადენისა და ახალციხე-არალის 300 მმ-იანი 16 კმ გაზსადენის მშენებლობები.
ენერგეტიკისა და ბუნებრივი რესურსების სამინისტროს ინფორმაციით, 2012 წელს გაგრძელდება სატყეო სფეროში რეფორმები, რაც ახალი ტყის კოდექსის მიღებას და შესაბამისი კანონქვემდებარე ნორმატიული აქტების შემუშავებას ითვალისწინებს. საკანონმდებლო კუთხით ასევე დაგეგმილია წიაღის არსებული კანონონმდებლობისა და ნადირობასთან დაკავშირებული კანონქვემდებარე აქტების სრულყოფა.
გარემოზე მიყენებულ (მნიშვნელოვან) ზიანთან დაკავშირებული შეთანხმებების მოდელი შეიქმნება. გარდა ამისა, ბუნებრივი რესურსებით სარგებლობის მოსაკრებლების ადმინისტრირების ახალი სისტემა დაინერგება, მათ შორის საგადასახადო შეთანხმებები.
ტყითსარგებლობის ლიცენზიები გრძელვადიანი იჯარებით ჩანაცვლდება და მეიჯარეებთან ახალი ხელშეკრულებები გაფორმდება. მოხდება არსებული ლიცენზიების სრულყოფილი მონიტორინგი.
შეიქმნება ბუნებრივი რესურსების გეოინფორმაციული სისტემა, დაიწყება ლიცენზიებისა და ნებართვების ელექტრონული ფორმით გაცემა, ხოლო არსებული მომსახურების ხარისხის გაუმჯობესდება.
სექტორში ინვესტიციების მოზიდვის მიზნით, გამოცხადდება ახალი სალიცენზიო ობიექტები.